«Milan» rahbariyati futbolchilarni «Atalanta»ga qarshi o'yinga o'zgacha uslubda tayyorlamoqda

"Milan" rahbariyati A seriyaning 38-turi doirasida bo'ladigan "Atalanta"ga qarshi o'yinga futbolchilarni noodatiy uslubda tayyorlashga qaror qildi.

"Football Italia" xabar tarqatishicha, jamoa bosh murabbiyi Stefano Pioli va klub direktori Paolo Maldini futbolchilardagi bosimni olib tashlash maqsadida mashg'ulot bazasida barbekyu uyushtirishdi.

"Atalanta" va "Milan" o'rtasidagi o'yin 23 may kuni bo'lib o'tadi. Mavsum tugashiga bir tur qolganida "rossoneri" A seriyada 76 ochko bilan 3-o'rinni egallab turibdi. To'rtinchi pog'onadagi "Napoli" hisobida ham shuncha ochko mavjud. "Yuventus" esa ulardan bir ochko ortda qolmoqda.

"Milan" Chempionlar ligasi yo'llanmasini qo'lga kiritish uchun "Atalanta" ustidan g'alaba qozonishi kerak.