PFL bosh direktori OFKning klublarni litsenziyadan o'tkazish bo'yicha seminarida ishtirok etmoqda

Bugundan Malayziya poytaxti Kuala Lumpur shahrida joylashgan Osiyo Futbol Konfederatsiyasi bosh qarorgohida OFKning klublarni litsenziyadan o'tkazish bo'yicha seminari ish boshladi.

28 fevral – 1 mart kunlari bo'lib o'tadigan mazkur seminarda qit'amiz futbol uyushmasiga a'zo 43 ta mamlakat futbol federatsiyalari hamda futbol ligalari vakillari, shuningdek, klublarning litsenziyalash bo'yicha menejerlari bilan bir qatorda FIFA, UEFA va CAFning mutaxassislari ishtirok etishmoqda.

Seminar kun tartibidan o'rin olgan asosiy masala – futbol klublari ish faoliyati va infratuzilmasini yaxshilashda litsenziyadash jarayoni ahamiyati yuqori ekani va ortda qolgan 2018 yilgi mavsumda klublarni litsenziyadan o'tkazish jarayonida ko'zga tashlangan yutuq va kamchiliklarni muhokama etib, yangi mavsumda Evropa va jahon tajribasidan unumli foydalanish sanaladi.

Seminarda ishtirok etgan OFK bosh kotibi – janob Vindzor Jon so'nggi yillarda qit'amizning barcha mamlakatlarida ham klublarni litsenziyash jarayoni muhimligiga e'tibor qaratilayotganidan mamnun ekanini bildirib, litsenziyalash talablari yuqori bo'lishi klublarning yaxshi infratuzilmaga ega bo'lishini ta'minlashini alohida qayd etdi.

Ta'kidlash joiz, mazkur seminarda OFKning klublarni litsenziyadan o'tkazish ishlarini muvofiqlashtirish qo'mitasi a'zosi sanaluvchi O'zbekiston Professional futbol ligasi bosh direktori Omon G'ofurov ham ishtirok etmoqda.

Seminarning birinchi kunida asosan FIFA vakillari litsenziyalash jarayonining nozik jihatlari haqida batafsil ma'lumot berishdi. Ertaga esa ushbu jarayon qita'miz ligalarida qanday amalga oshirilayotgani, undagi yutuq va kamchiliklar muhokama etilishi ko'zda tutilgan.