Shuhrat Maqsudov: «Birinchi davrani yakunlab olsak, tarkibga yaxshi futbolchilarni olishni reja qilganmiz»

O'zbekiston Superligasining 9-turidan o'rin olgan «Bunyodkor» - «Navbahor» o'yinidan keyingi matbuot anjumanida mezbonlar bosh murabbiyi Shuxrat Maqsudov jurnalistlar savollariga javob berdi.

«Avvalgi turdagi alamli mag'lubiyatdan keyin, futbolchilarning ruhiy holatini yaxshilash uchun ishladik. O'ylashimcha, bugun jamoa mazmunli o'yin ko'rsatdi. Ammo, bizga futboldagi eng kerakli unsur omad etishmadi. Shogirdlarimga bugungi o'yin uchun minnatdorlik bildiraman. Bugungi kunda kim kuchli bo'lsa, o'sha maydonga tushadi.

Mirjahon Marahmadovning o'yini shahsan meni qoniqtirdi, shu bois unga ishonch bildirdim. Menimcha, bugungi kunda feyr-pleyga eng ko'p amal qiladigan jamoa «Bunyodkor» bo'lsa kerak. Bitta o'sha birinchi bo'limda Farrux Ikromov o'yinni to'xtatmaganini aytmaganda, boshqa bunday holat kuzatilmadi. Mavsum boshida ham ta'kidlagan edim.

Yaxshi homiyga ega bo'lganimizda transfer oynasi yopilgan edi. Birinchi davrani yakunlab olsak, tarkibga yaxshi futbolchilarni olishni reja qilganmiz. Yangilar ichida yoshlar jamoasidan ham vakillar bo'ladi, albatta.

«Navbahor»ni «Neftchi»da ishlab yurgan paytimdan juda hurmat qilaman. Namanganda futbolni yaxshi ko'rishadi. «Bunyodkor» har bir o'yinga raqibni hurmat qilgan holda tushadi. Jumladan, «Navbahor»ni ham. Lekin bugungi durang biz uchun mag'lubiyatga teng bo'ldi», - deya ta'kidladi toshkentliklar ustozi.

Manba: stadion.uz