Litsenzion turnirda ishtirok etuvchi taekvondochilarimiz nomi ma'lum

Xabaringiz bor, 21-22 may kunlari Iordaniyaning Amman shahrida osiyolik taekvondochilar o'rtasida Tokio-2020 Olimpiya o'yinlari uchun litsenzion turnir bo'lib o'tadi. Ushbu musobaqada O'zbekistondan 3 nafar (1 nafar erkak va 2 ayol) sportchi ishtirok etish huquqiga ega.

O'zbekiston taekvondo WT assotsiatsiyasining ma'lum qilishicha, terma jamoa murabbiylar shtabi olib borilgan yig'inlar va so'nggi musobaqalardan kelib chiqib ushbu muhim turnirda kimlar qatnashishi borasida yakuniy qarorga keldi.

Demak, Amman shahridagi litsenzion turnirda O'zbekiston sharafini Ulug'bek Rashitov (-58 kg), Nigora Tursunqulova (-67 kg) hamda Svetlana Osipova (+73 kg) himoya qiladigan bo'lishdi.

Eslatib o'tamiz, litsenzion musobaqada finalga chiqqan taekvondochilar Tokioda o'tadigan Olimpiadaga yo'llanmani qo'lga kiritishadi.