PFL «O'zbekinvest» eksport-import milliy sug'urta kompaniyasi bilan homiylik shartnomasi imzoladi

O'zbekiston Professional futbol ligasi 2019 yilgi mavsum davomida o'zaro hamkorlik qilish bo'yicha bir qator kompaniyalar bilan muzokaralar olib borayotgani sir emas. Maqsad bitta — bosqichma-bosqich klublar gardanida turgan talablarni yumshatish hamda bir necha yil ichida tashkilotni o'z-o'zini moddiy ta'minlay oladigan, kerak bo'lsa jamoalarni moddiy rag'batlantira ham oladigan holatga keltirish.

Bugun tashkilotimiz “O'zbekinvest” eksport-import milliy sug'urta kompaniyasi bilan homiylik shartnomasi imzoladi. Natijada “O'zbekinvest” O'zPFLning rasmiy sug'urta hamkoriga aylandi. Ushbu hamkorlik doirasida “O'zbekinvest” O'zPFL bayrog'i ostidagi musobaqalarda ishtirok etuvchi futbol klublarini homiylik yordami asosida sug'urtalaydi. Bu orqali Professional futbol ligasi klublarning sug'urta uchun sarf etadigan summalarini kamaytirish, sug'urta polisidagi futbolchilarga berilayotgan chegirmalarni esa ko'paytirishga erishadi.

Mazkur hamkorlik har ikki tomon uchun ham manfaatli bo'lishiga umid bildiramiz.