Usmon Toshev - «Buxoro» klubi bosh direktori etib tayinlandi

Bugun, 10 may kuni «Buxoro» klubi qarorgohida navbatdan tashqari yig'ilishi bo'lib o'tdi, deya xabar bermoqda klub matbuot xizmati.

«Unda Buxoro viloyati hokimining turizm, sport, madaniyat, madaniy meros va ommaviy kommunikatsiyalar masalalari bo'yicha o'rinbosari Botirjon Shaxriyorov, Buxoro jismoniy tarbiya va sport boshqarmasi boshlig'i Ismoil Mirzaev, Buxoro viloyat futbol assotsiatsiyasi birinchi vitse-prezidenti Farrux Hamroev hamda Buxoro futbol klubi rahbariyati va ishchi xodimlari ishtirok etishdi. 

Yig'ilish davomida «Buxoro» professional futbol klubi bosh direktori lavozimiga 2021 yil 10 maydan tajribali mutaxassis Usmon Qudratovich Toshev tayinlandi. 

Buxoro futbolida o'chmas iz qoldirgan, shu kunga qadar Tojikiston milliy jamoasi bosh murabbiy va o'zbekistonlik murabbiylar orasida ilk Pro-litsenziyasi sohibi Usmon Qudratovich endigi faoliyatini «Buxoro» jamoasida davom ettiradi», - deya yoziladi klub xabarida.

Ma'lumot uchun, Usmon Toshev Tojikiston milliy jamoasi bosh murabbiyi hisoblanadi. Mutaxassisning qo'shni mamlakat milliy jamoasini tark etishi haqida hozircha xabar berilmagan.

Eslatib o'tamiz, yanvar oyida «Buxoro» klubi bosh murabbiyi sifatida Jamshid Saidov o'rniga Davron Fayziev tayinlangan edi. Aprel oyi yakunida Fayziev iste'foga chiqarilib, uning o'rniga yordamchi murabbiy Anvar Berdiev bosh murabbiy vazifasini bajaruvchi sifatida ish boshladi. Klub Pro liga 6-turidan keyin 10 ochko bilan 2-o'rinda bormoqda.