Sobiq hakam: «Ronaldu maydondan chetlatilishi kerak edi»

Sobiq hakam Luka Marelli «Yuventus» hujumchisi Krishtianu Ronaldu «Kalyari»ga qarshi o'yinda maydondan chetlatilishi kerak edi, degan fikrni aytib o'tdi.

Portugaliyalik futbolchi bahsning 14-daqiqasida to'pga etish maqsadida oyog'ini baland ko'tardi va butsasining tishlari bilan raqib darvozaboni Alessio Kranoning bo'yniga tegib ketdi. Natijada posbondan qon chiqdi. Xavfli o'yin uchun Krishtianu sariq kartochka oldi.

«Bu qizil kartochka. Jiddiy qoidabuzarlikning klassik ko'rinishi. Ronalduning xatti-harakati, ataylab qilinmagan bo'lsa-da, ushbu toifaga mos keladi. VAR yomon ishladi», – dedi Marelli "Radio 24" efirida.

Eslatib o'tamiz, Ronaldu mazkur bahsda "xet-trik"ni rasmiylashtirdi.