0:20 hisobidagi mag'lubiyatdan keyin «Pro Pyachentsa» «S» seriyadan chetlatildi

Italiya S seriyasi doirasida bo'lib o'tgan «Kuneo» va «Pro Pyachentsa» jamoalari o'rtasidagi o'yinda 20:0 hisobi qayd etilgani haqida xabar berib o'tgandik.

Moliyaviy qiyinchiliklar tufayli mehmonlar asosiy futbolchilarning barchasi jamoani tark etgan bo'lsa, bu bahsga 7 nafar futbolchi bilan tashrif buyurishgandi. Ular orasida klub massajisti ham bor edi. Agar «Pro Pyachentsa» mazkur o'yinga kelmasa, texnik mag'lubiyat va disklifikatsiya kutayotgandi.

Shunga qaramay, S seriya rahbariyati klubni musobaqadan chetlatishga qaror qildi. Bu haqda musobaqa rasmiy Tvitteri xabar tarqatdi.

«Bu sport printsiplarining qo'pol tarzda buzilishi edi. Yosh futbolchilarning ota-onalari nima uchun ularning maydonga tushishiga yo'l qo'yishdi? Shunchaki do'stlariga professional futbolda debyut qilganini aytib berish uchunmi? Buni eshitib g'azabga tushdim», — dedi S seriya prezidenti Franchesko Girelli.