Angliya yoshlar jamoasida o'ynayotgan Musiala Germaniya MTJsini tanlashga qaror qildi

«Bavariya» yarim himoyachisi Jamol Musiala Angliya terma jamoasi emas, Germaniya terma jamoasida o'ynashga qaror qildi.

Ikki kundan keyin 18 yoshga to'ladigan futbolchi ikki davlat fuqaroligiga ega. U Shtutgart shahrida tug'ilgan bo'lib, uning onasi Germaniya fuqarosi bo'lsa, otasi esa kelib chiqishi nigeriyalik bo'lgan Britaniya fuqarosi. Jamol 7 yoshga to'lganida ularning oilasi Angliyaga ko'chib o'tgan.

«Men o'z hissiyotlarimga quloq solgan holda Germaniya terma jamoasida o'ynashga qaror qildim. Bu to'g'ri qaror. Men bu mamlakatda tug'ilganman. Qaror qabul qilish esa oson bo'lmadi», – dedi Jamol.

Jamol Musiala Angliyaning U15, U16, U17 va U21 jamoalarida o'ynagan. Shuningdek, u Germaniya U16 o'smirlar jamoasi safida ikkita o'yinda maydonga tushgan.

U «Bavariya»ning asosiy jamoasi tarkibida 26ta uchrashuvda ishtirok etib, 4ta gol urgan.