«Bunyodkor» akademiyasida faoliyat olib borayotgan murabbiylar kasbiy mahorati sinovdan o'tkazildi

“Bunyodkor” klubi rahbariyati tomonidan 6-8 fevral davomida klub akademiyasida faoliyat olib borayotgan murabbiylar kasbiy mahorati sinovdan o'tkazildi.

Imtihon davomida murabbiylarning maydonni mashg'ulotga tayyorlash, mashg'ulot davomida bolalarga ko'rsatmalar berib borish usullari, murabbiyning mashg'ulot davomida o'zini tutishi, futbolchilarning mashg'ulotdagi xatolarini aniqlash, ko'rsatib borish va o'sha xatolarni to'g'irlash borasida amalga oshiradigan xatti-harakatlari tekshirildi. Shuningdek, murabbiylarning mashg'ulot paytida bolalarni nazorat qilib borish uchun pozitsiya tanlashdagi bilim va ko'nikmalari hamda mashg'ulot davomidagi faolligi ko'zdan kechirildi. Murabbiylar kasbiy mahoratlarini sinovdan o'tkazishda “Bunyodkor” bosh direktori U.Mirzaev, akademiya direktori V.Shadimatov, ilmiy maslahatchi R.Akromov, psixolog T.Usova va bir qator malakali mutaxassislar jalb qilindi.

Jami 21 nafar murabbiylardan imtihonlar olindi va shulardan ayrim murabbiylarga mahoratini oshirish va o'z ustida ishlash uchun imkoniyat berish barobarida, malakali murabbiylar tomonidan ularga uslubiy ko'rsatmalar berib borilishi ta'kidlandi. Belgilangan reja asosida, olti oylik muddatdan so'ng ulardan qaytadan imtihon olish haqida ogohlantirildi.