Parataekvondochilarimiz jahon chempionatidan 3 ta medal bilan qaytishdi

Xabar berib o'tganimizdek, Turkiyaning Antaliya shahrida parataekvondo bo'yicha jahon chempionati bo'lib o'tdi.

Tokio Paralimpiadasi uchun qimmatli bo'lgan reyting ochkolarini taqdim etuvchi mazkur jahon chempionatida o'zbekistonlik sportchilar ham ishtirok etishdi.

Musobaqa yakuniga ko'ra, erkaklar o'rtasidagi bahslarda Azizjon Marasulov (+75 kg, K-44 yo'nalishi) va Sanjar Muxtorov (-61 kg, K-42) bronza medaliga sazovor bo'ldi. Qizlarimizdan esa Guljanoy Naimova (+58 kg, K-44) finalgacha etib borib, kumush medali sohibasiga aylandi.

Bugun sportchilarimiz yurtimizga qaytib kelishdi. Ular Islom Karimov nomidagi Toshkent xalqaro aeroportida kutib olindi.