Pochettino: «APLda chempionlik uchun imkoniyat bor»

Angliya premer-ligasining 25-turida "Nyukasl" ustidan g'alaba qozongan (1:0) "Tottenxem" bosh murabbiyi Maurisio Pochettino jamoasining APLdagi g'oliblik uchun imkoniyati haqida o'z fikrlarini bildirib o'tdi.

"Chempionlik uchun imkoniyat bormi? Futbolda hamma narsa ro'y berishi mumkin. Lekin hozir "Lester"ga qarshi bo'ladigan keyingi o'yinga tayyorgarlik ko'rishimiz kerak.

Angliya liga kubogi va Angliya kubogidagi omadsizliklardan so'ng xafsalamiz pir bo'ldi. Jarohatlar tufayli qiyin holatga tushib qolgandik. Lekin jamoamiz kurashda davom etadi. Angliya chempionatida qozonilgan 2ta g'alaba bizga yordam berdi. Endi esa Evropa chempionlar ligasi o'yinini kutamiz. Bu bizga motivatsiya beradi.

"Nyukasl"ga qarshi o'yin og'ir kechdi. Hozir "qarg'alar" yaxshi formada. Futbolchilarimning harakatlaridan qoniqish hosil qildim. Ular xarakter namoyish qilishdi", – dedi Pochettino Sky Sports.

APLning 25-turidan keyin "Tottenxem" 57 ochko bilan peshqadam "Liverpul"dan 4 ochko ortda qolmoqda. Mersisaydliklar hisobida qo'shimcha bitta o'yin bor.