Neymar Ispaniyada sudga tortiladi

Ispaniya huquqni himoya qilish organlari Neymarni firibgarlik va korruptsiyada ayblamoqda. Kecha sud «PSJ» futbolchisining ayblovni olib tashlash haqidagi murojaatiga rad javobini berdi.

Neymar, «Santos» va «Barselona» klublari prezidentlari — Odilio Rodriges va Sandro Rossel 2013 yilda amalga oshirilgan transfer summasini kamaytirib ko'rsatganlikda ayblanmoqda.

Tergovchilarning ma'lumotiga ko'ra, tomonlar braziliyalik o'yinchining transfer huquqining 40 foiziga egalik qiladigan DIS kompaniyasiga kamroq pul to'lash maqsadida transferning real summasini yashirishgan.

Rasmiy ma'lumotlarga qaraganda, Neymar «Santos»dan «Barselona»ga 88,2 million evro evaziga o'tgan. U «Kamp Nou»da 4 yil faoliyat olib borib, 2017 yilning yozida 222 million evro evaziga «PSJ»ga o'tib ketdi.