«Metallurg» bugun Turkiyada TsSKA bilan o'ynaydi

Turkiyaning Antaliya shahrida o'quv-mashg'ulot yig'inini o'tkazayotgan Bekobodning “Metallurg” jamoasi bugun ikkinchi nazorat uchrashuvini o'tkazadi. Bugungi raqib anchagina jiddiy – Bolgariyaning 31 karra chempioni, 11 marta mamlakat kubogi, 13 marta harbiylar kubogi, 4 marta Bolgariya Superkubogini qo'lga kiritgan Sofiya shahrining TsSKA jamoasidir.

TsSKA 1948 yilning 5 may sanasida tashkil etilgan. Aslida jamoa 1923 yildan faoliyat yuritib kelgan “Atletik Slava”, 1944-48 yillarda “Chavdar” nomi bilan yuritilgan klub bazasida tashkil etilib, ikki yil mobaynida TsDV nomi ostida o'ynadi. Keyinchalik jamoa nomini “Narodna voyska”, TsDNV, “Sofiya garnizoni termasi”, TsDNA, TsFKA nomlariga o'zgartirdi. 1989/90 yilgi mavsumdan e'tiboran TsSKA nomida faoliyat yuritib kelmoqda.

TsSKA juda nomdor klub ekanligini yuqorida sanab o'tgan unvonlaridan bilib olish mumkin. Klub jami 59 ta sovrinni qo'lga kiritgan. Shuningdek, xalqaro maydonlarda ham muvaffaqiyatli qatnashgan. Evropa chempionlari kubogining ikki karra yarim finalchisi, bir martadan Kubok egalari kubogi hamda UEFA kuboklarida ham ½ finalda o'ynagan. TsSKAni “Ko'hna qit'a”da “chempionlar kushandasi” deb ta'riflashadi. Chunki, aksariyat mavsumlarda Evropaning eng nomdor jamoalarini nufuzli turnirlarda mag'lubiyatga uchratib, dovrug' taratgan.

Eslatib o'tamiz, bekobodliklarning Turkiya safaridagi ilk uchrashuvini Armanistonning uch karra chempioni – “Alashkert”ga qarshi o'tkazib, 0:3 hisobida imkoniyatni boy bergandi.

Ayni paytda TsSKA tarkibida mahalliy o'yinchilardan tashqari Braziliya, Kolumbiya, Portugaliya, Ekvador,Litva, Kongo, Kamerun singari mamlakatning legioner o'yinchilari to'p surishadi.

TsSKA jamoasiga Serbiya va Angliya fuqarosi Nestor El Maestro murabbiylik qiladi. Jamoa sardori Bolgariyat terma jamoasi o'yinchisi Bojidar Chorbadjiyki. Klubning uy stadioni “Bolgarska Armiya” 21995 tomoshabinga mo'ljallangan bo'lib, juda ham xushmanzara hududda joylashgan.

Bolgariya birinchi professional ligasida o'tgan mavsum “Ludogorets” 66 ochko to'plab, chempion bo'ldi. TsSKA esa chempiondan 3 ochko ortda qolib, vitse-chempionga aylandi.