Ronaldu Portugaliya davlat mukofotlaridan mahrum etilmaydigan bo'ldi

«Yuventus» hujumchisi Krishtianu Ronaldu Portugaliyada davlat mukofotlaridan mahrum etilmaydigan bo'ldi.

Avvalroq futbolchi Ispaniyadagi faoliyati davomida o'z daromadlarini soliqdan yashirgani bois Madrid sudi tomonidan 23 oylik shartli qamoq va 18,8 million dollar miqdorida jarimaga tortilgandi.

Besh karra «Oltin to'p» sohibi Evro-2016da g'olib chiqqani bois Portugaliyada "Xizmatlari uchun" ordeni bilan taqdirlangandi. Shuningdek, 2014 yilda Ronalduga buyuk ofitser darajasidagi Infanta don Enrike yulduzli ordeni taqdim etilgandi.

Portugaliya prezidenti huzuridagi davlat kengashi qabul qilgan qarorga ko'ra, futbolchida yuz bergan qoidabuzarlik davlat mukofotlaridan mahrum qilish qoidasiga mos kelmaydi. Shu bois, nufuzli unvonlar undan olib qo'yilmaydi.