Tokioda o'zbek sportining zafarli onlari va mamlakatimizning turistik salohiyati bo'yicha taqdimot o'tkazildi

Milliy olimpiya qo'mitasi delegatsiyasi Tokioda sport tashkilotlari vakillari bilan muzokara olib borishda davom etadi.

MOQ vitse-prezidenti Komil Ro'ziev Tokio Olimpiya va Paralimpiya o'yinlarini o'tkazish ishlari vaziri, Yaponiya Parlamenti deputati Yoshitaka Sakurada bilan birgalikda «Yaponiya-O'zbekiston Ipak yo'li» fondining anjumanida faxriy mehmon sifatida ishtirok etdi. Ular yig'ilishda O'zbekiston bilan birga amalga oshiriladigan qo'shma loyihalar taqdimotini ham o'tkazdilar.

Vazir Y.Sakurada MOQ vakillari bilan muzokaralarni yuqori baholadi va O'zbekiston bilan nafaqat sport, balki turizm sohasida ham hamkorlikni qo'llab-quvvatlashga tayyor ekanligini ma'lum qildi.

Tadbir tashkilotchisi, “Yaponiya-O'zbekiston Ipak yo'li” fondi vasiylik kengashi raisi, Yaponiya sumo assotsiatsiyasi faxriy raisi Katsuki Ebisava yaqindan hamkorlik, Toshkent va Tokio o'rtasida jismoniy tarbiya va sport tibbiyoti yo'nalishida birgalikda amalga oshirilayotgan loyihalar uchun O'zbekiston MOQ prezidenti Umid Ahmadjonovga o'z minnatdorchiligini izhor etdi. Shuningdek, O'zbekiston MOQ vakillarining Yaponiyaga tashrifi Tokio Olimpiya va Paralimpiya o'yinlari oldidan har ikki mamlakat uchun samarali bo'lishida katta ahamiyat kasb etishini ma'lum qildi.

Yig'ilish davomida MOQ vitse-prezidenti Komil Ro'ziev O'zbekistonda sport sohasidagi erishilgan yutuqlar va mamlakatimizning turistik salohiyati bo'yicha taqdimot o'tkazdi.