Sirdaryoda bolalar-o'smirlar futbol akademiyalari shifokorlari uchun seminar boshlandi

O'zbekiston futbol assotsiatsiyasi tomonidan hududiy bolalar-o'smirlar futbol akademiyalari faoliyatini to'g'ri yo'lga qo'yish, ularning samaradorligini oshirish, akademiyalar tarbiyalanuvchilaridan mahoratli futbolchilar etishib chiqishini ta'minlash maqsadida bir qator chora-tadbirlar amalga oshirilmoqda.   Hozirgi kunga kelib, sportchilarning faoliyatida tibbiyot xodimlarining tutgan o'rni katta ahamiyatga ega bo'lib, doimo hamkorlikda faoliyat yuritishlari talab etilmoqda.      Shu munosabat bilan, 30-31 yanvar hamda 1 fevral kunlari Sirdaryo viloyat bolalar-o'smirlar futbol akademiyasida hududiy futbol akademiya direktorlari, sport ishlari bo'yicha direktor o'rinbosarlari hamda sport shifokorlari uchun tashkil etilgan o'quv-seminari davom etmoqda.    O'quv-seminarining ikinchi kunida hududiy futbol akademiyalarining sport shifokorlari uchun “Respublika sport tibbiyoti ilmiy-amaliy markazi”dan sportchilarni tibbiy ko'rikdan o'tkazish va doimiy nazorat qilish bo'yicha malakali mutaxassis Sunnatulla Yulchiev hamda hududiy bolalar-o'smirlar futbol akademiyalarining sport ishlari bo'yicha direktor o'rinbosarlarini faoliyatini tartibga solish hamda ularning faoliyatlarini nazoratga olish yuzasidan “Futbolni rivojlantirish departamenti” direktori Ongarbay Djalimov tomonidan o'quv qo'llanmalar tarqatilib, tegishli ko'rsatmalar berilmoqda.     Ertaga ya'ni 1-fevral kuni Sirdaryo viloyatining tibbiyot xodimlaridan tashkil topgan guruh hamda “Respublika sport tibbiyoti ilmiy amaliy markazi”ning sport shifokori Sunnatulla Yulchiev boshchiligida hududiy bolalar-o'smirlar futbol akademiyalarining sport shifokorlari, egallagan bilimlari asosida amaliyotda tadbiq etib, futbol akademiya tarbiyalanuvchilarini tibbiy ko'rikdan o'tkazishadi.