Rakitich faoliyatini qaerda davom ettirish niyatida ekanini aytdi

"Barselona" yarim himoyachisi Ivan Rakitich o'zining kelajagi borasida fikr bildirib o'tdi. So'nggi kunlarda unga "Chelsi" qiziqish bildirayotgani haqida xabarlar paydo bo'ldi. Boz ustiga, "ko'k-anorranglilar" Frenki de Yong bilan shartnoma imzolashdi.

"Men jamoada qolishni istayman. Umid qilaman, klub men bilan shartnomani uzaytiradi. Men "Barsa"da yana uzoq yillar o'ynashni istayman. "Barselona"da baxtliman. Buni barcha, avvalo klub prezidenti biladi. Ortiqcha gapga hojat yo'q.

De Yongning jamoaga kelishi mening kelajagimga ta'sir ko'rsatadimi? Meni taniydilar yaxshi biladiki, men shunchaki futbol o'ynashni istayman. Qolgan masalalarni xotirjamlik bilan hal qilaman. Hozir 30 yoshdaman. Bu faoliyatimdagi eng gullagan palla. Men "Barselona" safida futboldan maroqlanishni istayman", – dedi Rakitich Goal nashriga bergan intervyusida.

Xorvatiyalik futbolchi Ispaniya chempionatining ushbu mavsumida 20ta o'yinda maydonga tushib, 2ta gol urdi va bitta golga uzatma berdi.