«Paxtakor» ertaga «Brondbyu» bilan o'ynaydi

Ertaga "Paxtakor" BAA yig'ini doirasida birinchi o'rtoqlik o'yinini Daniyaning "Brondbyu" jamoasiga qarshi o'tkazadi.

Kopengagen shahri sharafini himoya qiluvchi klub 1964 yil tashkil etilgan va Daniyaning eng mashhur jamoalaridan biri sanaladi. "Brondbyu" hozirgacha Daniya chempionatida 10 marta va Daniya Kubogida 7 bor g'alaba qozongan. Daniya Ligasi Kubogida 2, Superkubogida 4 marta erishilgan muvaffaqiyatlarga ega. Chempionlar ligasida 1987 yil chorak finalga, UEFA Kubogida 1991 yil yarim finalga etib borgan. Ushbu jamoa Daniya futboliga ko'plab yulduzlarni etishtirib bergan. Mikael Laudrup, Peter Shmeyxel, Ebbe Sand, Brayan Laudrup kabi mashhur o'yinchilar aynan ushbu klubda faoliyat olib borishgan.

Jamoani 2016 yildan beri germaniyalik mutaxassis Aleksandr Tsorniger boshqarib kelmoqda. Joriy mavsumda "Brondbyu" chempionatda 20 o'yindan keyin 30 ochko to'plagan holda uchinchi pog'onada bormoqda.

"Paxtakor" va "Brondbyu" jamoalari o'rtasidagi bahs 28 yanvar, dushanba kuni BAAdagi "Jebel Ali" markazi maydonida Toshkent vaqti bilan 17:00da boshlanadi.