Tennis. Sanjar Fayziev Qozondagi musobaqa g'olibi

22-27 yanvar kunlari Rossiya Federatsiyasining Qozon shahrida tennis bo'yicha erkaklar o'rtasida mukofot jamg'armasi 25 000 AQSh dollarini tashkil etuvchi «Fyuchers» turniri bo'lib o'tdi.

Quvonarlisi, musobaqada ishtirok etgan hamyurtimiz Sanjar Fayziev finalgacha etib bordi va bosh sovrin egasiga aylandi. U turnir davomida Aleksandr Igoshin (Rossiya), Sergey Fomin (O'zbekiston), Aleksander Vasilenko (Rossiya) kabi tennischilardan ustun kelib, finalgacha etib bordi. Bugun hamyurtimiz hal qiluvchi bahsda boshqa bir mezbon tennischi Teymuraz Gabashviliga qarshi kortga chiqdi. 2 soat 12 daqiqa davom etgan uchrashuvda Fayziev raqibini 6:3, 7:5 hisoblarida mag'lub etdi va turnir g'olibiga aylandi.

Musobaqada ishtirok etgan boshqa bir tennischilarimiz Humoyun Sultonov va Sergey Fomin o'z ishtiroklarini ikkinchi davrada yakunladilar. Turnirning juftlik bahslarida rossiyalik Aleksander Vasilenko bilan birga ishtirok etgan Humoyun Sultonov finalgacha etib bordi va vitse-chempion unvoniga sazovor bo'ldi.