Rasman. Anri iste'foga chiqarildi, Jardim «Monako»ga qaytdi

«Monako»da yana bosh murabbiy o'zgardi. Knyazlik klubi Anrini iste'foga chiqarib, avvalgi bosh murabbiy Leonardu Jardim bilan shartnoma imzoladi. Ushbu shartnomaga ko'ra, portugaliyalik mutaxassis 2021 yilning yoziga qadar jamoani boshqaradi.

Xabaringiz bor, «Monako» rahbariyati bundan 3 oy avval salbiy natijalar tufayli Jardimni iste'foga chiqarib, uning o'rniga Terri Anrini olib kelgandi. Ammo frantsiyalik mutaxassis qo'lostida ham jamoaning natijalari ijobiy tomonga o'zgarmadi. Boz ustiga, so'nggi kunlarda bir qator futbolchilar va murabbiy o'rtasida mojaro yuzaga kelgani bois, Terri o'z ishidan chetlatilgandi.

«Dijon»ga qarshi bo'lib o'tadigan bugungi o'yinda klubni Jardim boshqarmaydi. Bitta o'yin uchun bosh murabbiy vazifasini Frank Passi bajaradi. Leonardu keyingi bahsdan boshlab bosh murabbiy vazifasiga kirishadi.