Akmal Shorahmedov: "Hozir kim qanday holatda ekanligi borasida aniq tasavvur yo'q"

Superliga restartiga taraddud ko'rgan AGMK bugun ertalab Navoiyga etib keldi va kunning ikkinchi yarmida uchrashuvdan oldingi so'nggi tayyorgarlik mashg'ulotlarini yakunladi. Jamoa sardori Akmal Shorahmedovning "Qizilqum" bilan o'yin oldidan qanday fikrda ekanligini bilish maqsadida futbolchiga yuzlandik.

"Karantin davri barcha jamoalarning holatini bir darajaga tushirdi. Endilikda o'yinlar orqali jamoalar o'z sport formalarini tiklab olishlari mumkin. Ertaga bizni oson bo'lmagan bahs kutmoqda. Chunki "Qizilqum"da murabbiy almashdi va odatda yangi murabbiy qo'l ostida futbolchilar o'zlarini ko'rsatishga ikki hissa kuch bilan harakat qilishadi. Hozir kim qanday holatda ekanligi haqida aniq tasavvur yo'q. Barchasini o'yin ko'rsatadi. Maqsadimiz o'zgarmaydi. Faqat va faqat g'alabani ko'zlab maydonga chiqamiz. Muxlislarsiz futbolning asl bezagi yo'qoladi. Lekin hozirgi sharoitda teleekran orqali ham futbol ko'rishni sog'inganlar va buni istovchilar nihoyatda ko'p. Shu bois hozircha shu sharoitda bo'lsada ishqibozlar futbolni tomosha qilishga mushtoq. Umid qilamizki, tez orada vaziyat yanada o'nglanib, muxlislar ham stadionga qaytishadi va bizni qo'llab-quvvatlab turishadi. Har qanday futbolchi uchun muxlislar olqishi va qo'llab-quvvatlovi muhim. Garchi bizda stadionlar to'lib toshmagan bo'lsada, stadionda futbol muhitini yaratishda muxlislarimiz faollik ko'rsatishgan. Ularning yo'qligi albatta seziladi, lekin biz muxlislar uyda yaxshi sifatdagi futbol tomosha qilishlari uchun harakat qilamiz", - deya o'yinoldi fikrlari bilan o'rtoqlashdi jamoa sardori Akmal Shorahmedov.