Fazliddin G'oibnazarovga «Jismoniy tarbiya va sport a'lochisi» ko'krak nishoni topshirildi

Mamlakatimizda jismoniy tarbiya va sportni rivojlantirish, yoshlar o'rtasida olimpiada harakatini targ'ib etishdagi faol ishtiroki, Rio-de-Janeyro (Braziliya) shahrida bo'lib o'tgan XXXI yozgi Olimpiada o'yinlaridagi yuksak sport mahorati va mardligi, xalqaro sport maydonlarida O'zbekistonning nufuzi va obro'-e'tiborini oshirishga qo'shgan hissasini inobatga olib Fazliddin G'oibnazarov “Jismoniy tarbiya va sport a'lochisi” ko'krak nishoni bilan taqdirlandi.

Taniqli sportchimizga mazkur mukofotni Jismoniy tarbiya va sport vaziri Dilmurod Nabiev topshirdi.

Vazir Dilmurod Nabiev Fazliddin G'oibnazarovga yurtimiz dovrug'ini dunyoga tanitish yo'lidagi sa'y-harakatlari uchun minnatdorchilik bildirib, sportchimizning yutuqlari yoshlarimiz orasida boksga, umuman sportga bo'lgan qiziqishning ortishiga xizmat qilayotganini ta'kidladi hamda vazirlik bundan keyin ham bokschimizni har tomonlama qo'llab-quvvatlashga tayyor ekanligini ma'lum qildi.

Endilikda professional boks bilan jiddiy shug'ullana boshlagan Fazliddin G'oibnazarov o'zining dastlabki bir necha jangini muvaffaqiyatli o'tkazib, ko'zlangan maqsad sari – jahon chempionligini qo'lga kiritish uchun dadil qadam tashlamoqda. Shuning barobarida u yurtimizda sog'lom turmush tarzini qaror toptirish, yoshlarni sportga keng jalb etish borasida amalga oshirilayotgan ishlarda ham juda faol.

Eslatib o'tamiz, Fazliddin G'oibnazarov 19 yanvar kuni Nyu-Yorkda dominikanlik bokschi Rikardo Garsiyaga qarshi jang o'tkazib, raqibini uchinchi raunddayoq taslim etib, g'alaba qozondi. U hozirgacha professional boksda o'tkazgan barcha ettita jangida g'alaba qozongan, to'rt marta raqiblarini nokautga uchratgan.