«Portu»ning yaponiyalik yulduzi koronavirus sabab mashg'ulotlarda qatnashishdan bosh tortdi

«Portu» yarim himoyachisi Shoya Nakajima mashg'ulotlarni qayta boshlashdan bosh tortdi, deya xabar qilmoqda A Bola.

Bunga yaponiyalik futbolchining koronavirusdan cho'chiyotgani sabab qilib ko'rsatilgan. Futbolchi turmush o'rtog'ining sog'lig'ida muammolar bor, shu sabab yarim himoyachi ayolining hayotini xavf ostida qoldirishni istamayapti. «Portu» murabbiylar shtabi futbolchini yaqinlashib kelayotgan uchrashuv qaydnomasiga kiritmadi.

Agar 25 yoshli futbolchi mashg'ulot va o'yinlarda ishtirok etishdan bosh tortishda davom etsa, uning klubdagi taqdiri so'roq ostida qoladi.

Nakajimaning «ajdarlar» bilan amaldagi shartnomasi 2024 yilga qadar mo'ljallangan. Uning tovon puli 80 million evroni tashkil qiladi.

2019 yilning yozida Qatarning «Duhayl»idan «Portu» safiga kelib qo'shilgan Shoya joriy mavsum 28 o'yin o'tkazib, 1 gol va uchta golli uzatma muallifiga aylandi.