Internetda mashhurlikka erishgan darvozabon mushuk haqidagi video feyk bo'lib chiqdi (video)

Bloger va futbolchi Kris Dikson mushugi darvozaga yo'llangan zarbalarni mohirlik bilan qaytarayotgani aks etgan videoni e'lon qilgandi. Mushukning mahorati hatto «Bavariya»ni ham befarq qoldirmadi. Video umumiy miqdorda 200 million marta ko'rildi. Biroq bu videodagi harakatlar soxta bo'lib chiqdi: Dikson barchani aldadi va bu haqda videorolik suratga oldi.

Dikson mushuk qatnashgan video ulkan firibgarlik tizimining bir bo'lgani ekani haqida gapirdi. Faqat uni yaratishda ancha ter to'kishga to'g'ri keldi. Birinchidan, to'p mushukka u qadar qiziq bo'lmadi. O'yinchoq flamingo esa — boshqa gap. Dikson mushukning o'yinchoq flamingoni tutish uchun sakrayotgan holatlarini tasvirga oladi. Hosil bo'lgan videodan bloger 11 ta mos tushadigan qismni ajratib oladi. Keyinroq u tayanchga yopishtirilgan shtativni kerakli joyga o'rnatdi va unga qarata to'pni uloqtirishni boshladi. Shtativni mushuk sakragan joyga o'rnatish kerak edi. Keyinchalik mazkur fragmentlar montaj jarayonida birlashtirildi. Video yanada ishonchli chiqishi uchun Dikson to'p yo'nalishi o'zgargan holatlarni alohida suratga oldi.

Diksonning so'zlariga ko'ra, feyk video tarmoqqa yuklangach butun dunyodagi katta nashrlar u bilan bog'langan. Bloger ularga videodan foydalanishga ruxsat bergan, biroq bu video soxta ekanini ma'lum qilgan.

Feykmi yoki yo'q, biroq darvozabon «Myaunuel Noyer» haqidagi video — bu aql bovar qilmas voqea.