Andrey Kanchelskis: “O'zbek xalqi g'alabaga munosib hissa qo'shgan”
/ Kiritdi: BestMaster Ko'rilgan: 251
Bugun 9 may – Xotira va qadrlash kuni, shuningdek, II jahon urushida fashizm ustidan qozonilgan g'alabaning 75 yillik bayrami.
Ushbu ayyom munosabati bilan “Navbahor”ning rossiyalik bosh murabbiyi Andrey Antanasovich Kanchelskis yurtimizdagi urush hamda mehnat faxriylarini tabrikladi. Quyida uning tabrigini e'tiboringizga havola etamiz.
- Bugungi Xotira va qadrlash kuni, shuningdek, fashizm ustidan qozonilgan buyuk g'alabaning 75 yilligi munosabati bilan, barcha o'zbekistonlik urush hamda mehnat faxriylarini tabriklayman.
Urush yillarida o'zbek xalqi mardlik namunasini namoyish etib, janggohlarda ko'plab o'zbekistonliklar mardonavor jang qilishgani, ularning ko'pchiligi shunday tinch, dorilomon kunlarga etib kelishimiz uchun o'z jonlarini fido qilishganini kitoblarda o'qib, filmlarda ko'rganmiz.
Ikkinchi jahon urushida halok bo'lgan o'zbekistonliklarning xotiralari qalbimizda abadiy saqlanadi va ularning jasoratlari unutilmaydi.
Urush bo'layotgan shaharlardan O'zbekistonga evakuatsiya qilingan ko'plab oilalar hamda bolalarga o'zbekistonliklar boshpana berishgani, urush sababli, etim qolgan bolalarni farzand qilib, boqib olishgani, front ortida ham o'zbekistonliklarning samarali mehnat qilishgani tarixdan ma'lum.
Umuman olganda, o'zbek xalqi jahonni fashizm balosidan xalos etishga, buyuk g'alabaga o'zining munosib hissasini qo'shgan.
Fursatdan foydalanib, ayni paytda hayot bo'lgan II jahon urushi qatnashchilari, shuningdek, front ortida mehnat qilgan faxriylarga uzoq umr, sog'liq-salomatlik tilab qolaman.
Baxtimizga urush hamda mehnat faxriylari hamisha sog' bo'lishsin!
“Navbahor” PFK matbuot xizmati