Osiyo chempionatida muvaffaqiyatli qatnashgan sportchilar O'zbekistonga qaytib keldi

Xabaringiz bor, 8-13 yanvar kunlari Indoneziya poytaxti Jakarta shahrida velosportning trek yo'nalishi bo'yicha Osiyo chempionati o'tkazildi va unda O'zbekiston terma jamoasi a'zolari har qachongidanda muvaffaqiyatli ishtirok etishdi.

Bugun, 15 yanvar kuni Osiyo chempionatida sovrindor bo'lgan sportchilarimiz yurtimizga qaytib kelishdi. Ular Islom Karimov nomidagi Toshkent xalqaro aeroportida tantanali ravishda kutib olindi.

Marosimda O'zbekiston Respublikasi Bosh vaziri o'rinbosari, O'zbekiston velosiped sporti federatsiyasi raisi Tanzila Narbaeva, O'zbekiston Milliy olimpiya qo'mitasi Bosh kotibi Jasur Matchanov, Jismoniy tarbiya va sport vaziri o'rinbosari Sharifjon Mo'mindjanov, O'zbekiston velosiped sporti federatsiyasi mutasaddilari, yosh velosportchilar hamda ommaviy axborot vositalari xodimlari ishtirok etishdi.

Eslatib o'tamiz, musobaqa davomida O'zbekiston terma jamoasi sportchilari 7 ta medal (1 ta oltin, 2 ta kumush va 4 ta bronza) qo'lga kiritishdi. Ushbu muvaffaqiyat sportchilarimizga Tokio 2020 Olimpiadasi uchun qimmatli reyting ochkolarini taqdim etdi.