Jeymi Gittens kim?

2004 yilning 8 avgustida Londonda yorug' dunyo yuzini ko'rgan Jeymi o'zining futboldagi faoliyatini 5 yoshli chog'ida mahalliy «Kavershem Trents» klubida boshladi va 7 yoshgacha o'sha erda shug'ullandi.

2013 yilda bolakayni «Reding» tizimiga olib borishdi. U-9 jamoasida o'ynab yurgan chog'ida, Jeymiga «Chelsi» qiziqish bildirgan bo'lsada, u Berkshir grafligi klubidagi faoliyatini davom ettirdi. 2018 yilda yosh iqtidorga «Arsenal» va  «Manchester Siti»dan takliflar bo'ldi va u Manchesterga yo'l oldi.

«Avvaliga ishongim kelmadi. Axir men ovloq bir hududdagi bolakay edim. Meni nomdor jamoalarga taklif etishgani ochig'i, hayron qoldirdi. Keyin mashaqqatli mehnatlarim samara beryapti, deb o'yladim va o'zimni engil his eta boshladim. «Arsenal»ga o'tishim ham mumkin edi. Biroq men «Siti»ni tanladim. Chunki bu jamoa Braim Dias va Jeydon Sancho kabi mashhur o'yinchilarni voyaga etkazgandi», - degandi Gittens o'z intervyularidan birida.

Manchesterdagi faoliyati

«Shaharliklar» tizimida navqiron hujumchi o'zidan kattaroq yoshdagi tarbiyalanuvchilar guruhlarida nimalarga qodir ekanligini a'lo darajada namoyish etdi. 2019 yilning 14 sentyabrida Jeymi U-18 jamoasida gol urish bilan debyutini nishonladi. Jamoa esa 5:2 hisobida g'alaba qozondi.

«Liam (Delap) to'pni egallagan paytda oldinga o'tishim kerakligini his etdim. U meni ko'rdiyu, to'pni men tomonga yo'lladi. Natijada darvozabon bilan yakkama,yakka vaziyat yuzaga keldi. Avvaliga olisdan zarba yo'llamoqchi bo'ldim. Lekin hayajonda bo'lganligim sababli, darvozabonni aldab o'tdim va to'pni bo'sh qolgan darvozaga yo'lladim», - degandi Jeymi o'sha o'yin haqida.

«Raqobat o'ta kuchli. Agar siz talab darajasida o'ynamasangiz, zaxira o'rindig'iga mixlanasiz, jamoa yangi o'yinchilarni xarid qiladi. Siz doimo yuksak saviyada bo'lishingiz shart. «Man Siti» tarkibida to'p surish - ulkan baxt!» - bu esa Gittensning o'z jamoasiga bergan bahosi.

Ta'kidlash joizki, Jeydon Sancho Gittens uchun namuna bo'la oladigan futbolchi. Ularning «Siti»dagi faoliyatida o'xshash jihatlar juda ko'p. «Jeydon Sancho U-18 jamoasi tarkibida har bir o'yinda gol urardi. Men aynan u kabi sermahsul to'purar bo'lishni istayman», - degandi Jeymi Manchesterdagi davrida.

Germaniyadagi faoliyati

2020 yil sentyabrida qahramonimiz «Borussiya Dortmund» akademiyasiga o'tib, 19 yoshlilar jamoasi tarkibida to'p surgan va UEFA O'smirlar ligasi musobaqasida urgan 6ta goli evaziga jamoani chorak finalga olib chiqdi. 2022 yilning 8 aprelida Gittens asosiy jamoaning «Shtutgart»ga qarshi bellashuviga taklif oldi. Lekin maydonga tushmadi. Faqat bir haftadan keyingi «Volfsburg»ga qarshi uchrashuvda «tukli arilar» safidagi debyutini nishonlashga muvaffaq bo'ldi.

Nihoyat, 30 aprel sanasida Marko Roze («Borussiya»ning o'sha paytdagi bosh murabbiyi) Gittensni «Boxum»­ga qarshi bahsda boshlang'ich tarkibda maydonga tushirdi. «U aynan biz uchun etishmayotgan, ya'ni, qanot bo'ylab yuqori tezlikda darvozabon bilan birga,bir vaziyatga chiqa oladigan o'yinchi bo'lib chiqdi. To'g'ri, Jeymi Bundesliganing yuksak tempiga moslashib olishi lozim. U 60 daqiqadan keyin toliqib qoldi», - degandi murabbiy uchrashuv oxirida.

Keyingi mavsumda Jeymiga ko'proq o'yin amalieti bera boshladilar. Hujumchi o'zining dastlabki golini 2-turda «Frayburg» darvozasiga urdi. Umuman, Gittens turli musobaqalarda 19 marta maydonga tushib, 3ta gol va 1ta samarali uzatmani o'z hisobiga rasmiylashtirdi. 5-turdagi «Xoffenxaym»ga qarshi uchrashuvda elkasidan jarohat olib, 22ta o'yinni o'tkazib yubordi.

«Jeymi - jarohatlarga duch kelgan yuksak iqtidor sohibi. Shu sababli, biz uni 19 yoshlilar jamoasiga jalb eta boshladik», - degandi «qovoqarilar»ning sobiq bosh murabbiyi Marko Roze 2022 yilda.

2023/24 yillar mavsumi

O'tgan mavsum angliyalik hujumchi anchayin samarali o'tdi. Bundesliga doirasida u 25ta uchrashuvda (14tasini boshlang'ich tarkibda) maydonga tushdi. «Gittens o'yin tizginini tubdan o'zgartirib yuboradigan, yondira oladigan futbolchi», - deydi «Dortmund»ning sobiq bosh murabbiyi Edin Terzich.

2023 yilning 28 noyabrida Jeymi o'zining EChLdagi dastlabki golini rasmiylashtirdi, keyin assistni amalga oshirdi va «San-Siro»da «Milan» ustidan erishilgan g'alabaga salmoqli hissa qo'shdi. Shu tariqa pley-off bosqichiga yo'l olgan «Dortmund» esa faqat finalda «Real»ni enga olmadi. O'sha mavsumda Gittens 34ta uchrashuvda ishtirok etdi, 2ta gol va 8ta samarali uzatmani o'z hisobiga yozib qo'ydi.

Joriy mavsum

Yangi mavsum ham Jeymi uchun muvaffaqiyatli boshlandi. Bundesliga startidagi bellashuvda u «Ayntraxt» darvozasini 2 marta ishg'ol etdi, keyin EChL doirasidagi dastlabki o'yinda «Bryugge»ga dubl «hadya» etdi.

«Ustunlikka erishmoqchi bo'lgan jamoa mavsumni yorqin boshlashi lozim. Shunda kelajagi ham porloq bo'ladi. biz maydonda hukmronlik qiladigan jamoa bo'lishni istaymiz, to'p bilan ko'proq muomala qilsak, kamroq yuguramiz. Jamoamizning asosiy maqsadi shu», - dedi Gittens bundesliga.com saytiga bergan intervyusida.

R.IBROHIMOV tayyorladi