APL. «Manchester Siti» «Liverpul»ga mavsumdagi ilk mag'lubiyatni «tortiq» qildi

Angliya premer-ligasida nafaqat Boxing Day'ning, balki mavsumning eng uchrashuvlaridan biri bo'lib o'tdi. Mag'lubiyat nimaligini bilmay kelayotgan "Liverpul" klubi, safarda "Manchester Siti" mehmoni bo'lganiga qaramay, o'yinda favorit hisoblanayotgan edi.

Mersisaydliklar bahsning 19-daqiqasida hisobni ochishga yaqin kelishdi. Salohning uzatmasidan keyin Mane darvozabon bilan yakkama-yakka vaziyatga chiqib, zarba berdi. To'p ustunga tegib qaytdi. Qaytgan to'p uchun futbolchilar kurash olib borishi natijasida to'p darvoza tomon keta boshladi. So'nggi pallada Stounz "Siti"ni goldan qutqarib qoldi.

Birinchi bo'lim tugashiga 4 daqiqa qolganida Gvardiola shogirdlari hisobni ochishdi. David Silva chap qanotdan darvozaning yaqin ustuni tomon uzatma berdi. Aguero Lovrenga nisbatan chaqqonroq harakat qilib, o'tkir burchak ostida kuchli zarba bilan darvozani ishg'ol qildi.

Ikkinchi bo'lim o'rtalariga kelib, mehmonlar tashabbusni o'z qo'llariga olishdi va muvozanatni tiklashdi. Aleksander-Arnold o'ng qanotdan diagonal pas bilan jarima maydonchasining olis tomoniga uzatma berdi. Robertson to'pni erga tushirmasdan narigi ustun tomon etkazdi. Firmino bosh bilan bo'sh qolgan darvozaga to'pni joylab qo'ydi.

Oradan ko'p o'tmasdan "shaharliklar" yana hisobda oldinga chiqib olishdi. Sterlingdan uzatma qabul qilgan Leroy Sane o'zining chap oyog'i bilan 12 metrlardan aniq zarba bilan darvozani zabt etdi. Uchrashuvning so'nggi daqiqalarda "Manchester Siti" qarshi hujumda kamida 2ta ajoyib imkoniyatlarga ega bo'ldi. Ammo mezbonlarga bu vaziyatlarda omad etishmadi.

Shunga qaramay, "Man Siti" muhim o'yinda g'alabani qo'lga kiritdi. Endi "Liverpul" asosiy ta'qibchisidan 4 ochko oldinda bormoqda. APLda hali hammasi oldinda!

APL, 21-tur
Manchester Siti – Liverpul 2:1 (1:0)
Gollar: 1:0 – 40 Aguero, 1:1 – 64 Firmino, 2:1 – 72 Sane.
Manchester Siti – Ederson, Kompani (Otamendi, 88), Danilo, Stounz, Laport (Uoker, 86), Silva (Gyundogan, 65), Fernandino, Sterling, Bernardu Silva, Sane, Aguero.
Liverpul – Alisson, Lovren, Robertson, Aleksander-Arnold, van Deyk, Veynaldum (Starridj, 86), Xenderson, Milner (Fabino, 57), Mane (Shakiri, 77), Salax, Firmino.
Ogohlantirishlar: Lovren (20), Kompani (31), Veynaldum (38), Laport (45), Bernardu Silva (89), Ederson (90).