«Prague Masters». Nodirbek Abdusattorov 3-turda mezbon shaxmatchini mag'lub etdi

Chexiya poytaxti Praga shahrida shaxmat bo'yicha "Prague Masters" xalqaro musobaqasida bugun 3-tur o'yinlari bo'lib o'tdi.

Hamyurtimiz Nodirbek Abdusattorov bu turda chexiyalik David Navaraga qarshi oq donalarda o'ynadi. Hamyurtimiz o'yin debyutidan ustunlikni qo'lga olib, o'z imkoniyatlarini yaxshilab bordi. Hamyurtimiz 19-yurishda bahs taqdirini hal qilib qo'yishi mumkin edi, ammo u eng kuchli yurishni topa olmadi. Shunda ham ustunlik Nodirbek tomonida qoldi.

21-yurishdan boshlab esa Abdusattorov noaniqliklarga yo'l qo'ya boshladi. Buning oqibatida dastlab vaziyat tenglashdi, 28-yurishga kelib esa Navara yutuqli vaziyatga ega bo'ldi. Ammo David kuchli yurishni topa olmagani etmaganidek juda katta xatoga yo'l qo'ydi. Abdusattorov esa darhol qarshi zarbani berib, vaziyatni 180 gradusga o'zgartirdi va 36-yurishga kelib g'alabani qo'lga kiritdi.

Nodirbek ushbu g'alaba tufayli ochkolarini 2,5 taga etkazdi va jadvalda 2-o'ringa ko'tarilib oldi. Eronlik Parham Maqsudlu hisobida ham shuncha ochko bor. Abdusattorov ertaga Domaradju Gukesh (Hindiston)ga qarshi oq donalarda o'ynaydi.

Manba: stadion.uz