Tata Steel Chess 2024. Nodirbek Abdusattorov 3-turda Maqsudluni mag'lub etdi

Niderlandiyaning Veyk an-Zee shahrida shaxmat bo'yicha Tata Steel Chess 2024 turnirida bugun 3-tur bahslari bo'lib o'tdi.

Turnirning masters guruhida ishtirok etayotgan o'zbekistonlik grossmeyster Nodirbek Abdusattorov eronlik Parham Maqsudluga qarshi qora donada o'ynadi. Bahs juda shiddatli bo'ldi. 13-yurishda eronlik sportchi xatoga yo'l qo'ygach, ustunlik Nodirbek tomonga o'ta boshladi, ammo 15-yurishda o'zbek shaxmatchisi xato qildi. Biroq 19-yurishda xato qilish navbati Maqsudluga keldi. Shundan keyin Abdusattorov ketma-ket kuchli yurishlarni topa boshladi. Ayniqsa, 23-yurishni kompyuter "Brilliant move" sifatida baholadi. Boz ustiga, Parham vaqt tanqisligiga duch keldi va Nodirbekning bosimidan chiqib keta olmadi. Eronlik shaxmatchi 34-yurishga kelib mag'lubiyatni tan oldi.

Abdusattorov bugungi g'alabadan keyin o'z ochkolarini 2 taga etkazdi va 5-o'ringa ko'tarilib oldi. Hamyurtimiz 4-turda peshqadam Alirizo Firujaga qarshi qora donada o'ynaydi.