Xoland ovi: katta klublar ishga tushdi. Ular "maxluq"ni qanday rom etishmoqchi?
/ Kiritdi: BestMaster Ko'rilgan: 139
Erling Xolandning agenti, superyulduz "Manchester Siti"dan ketishi mumkin ekaniga ishora qildi. 23 yoshli hujumchi "shaharliklar" bilan birinchi mavsumni fantastik darajada yakunlagandi. U trebl sohibi bo'lish bilan bir qatorda, bir nechta individual sovrinlarga ham ega chiqqan. Joriy mavsumda ham Xoland o'z ishini davom ettirmoqda. Ayni damda norvegiyalik hisobida 17 ta gol mavjud. Garchand Xoland Manchester klubida ajoyib davrlarni boshdan kechirayotgan bo'lsa ham, futbolchining agenti Rafaela Pimenta uning yangi klubga o'tishini inkor qilmayapti. Yaqin kelajakda bu narsa sodir bo'lishi mumkin.
Pimentadan Xoland kelajagi haqida so'ralganida, mutaxassis shunday javob beradi: "Avvalo, shuni aytishim kerakki, Erling o'z taqdirini o'z hal qiladi. Doimo, unga tanlash imkoniyatini berganman. Xoland o'zi va "Manchester Siti" uchun eng yaxshi yo'lni tanlay oladi deb o'ylayman. Qachonki, Xoland va uning klubi o'zgarishlarga tayyor bo'lganida, shunda nimadir sodir bo'lishi mumkin. Erling o'z faoliyati davomida jamoasiga doimo hurmatni saqlab keladi. O'ylashimcha, bu narsa har ikki tomonda ham mavjud. Shubhasiz, "Manchester Siti" ham Xolandning qabul qilajak qarorlariga hurmat bilan qaraydi. Agarda kelajakda, uning fikri o'zgarib qolgudek bo'lsa, hammasi hurmat asosida yuz beradi. Ketish hamma tomonning roziligi bilan bo'ladi".
Quyida Erling Xoland uchun da'vogar jamoalarga e'tiboringizni qaratmoqchimiz. Demak, boshladik.
"Real"
Yozda madridliklar Karim Benzeman bilan xayrlashdi. Hozirda uning o'rniga Xoselu olib kelingan. Aslida mavsum boshlanishidan oldin Kilian Mbappe olib kelinishi kerak edi. Ammo bunday bo'lmadi. Agarda Mbappe masalasi omadli yakunlanmasa, u holda "Real" e'tibori Xolandga qaratiladi. Madrid klubi norvegiyalik evaziga 200 million funt to'lov qilishi mumkin. Yaqindagina Xolandning agenti Pimenta "Santiagu Bernabeu"ga tashrif buyurgandi. Bu esa mish-mishlarni yanada urchishiga sabab bo'ldi.
"Barselona"
"Barselona" Xolandning Ispaniyadagi boshqa bir manziliga aylanishi mumkin. Levandovski 35 yoshdan oshdi. Shu sababli yaqin kelajakda unga o'rinbosar kerak bo'ladi. Xoland esa "Borussiya Dortmund"dayoq "Barsa" muxlisi ekanini yashirib o'tirmagan. Shu sabab, hujumchi sevimli jamoasiga o'ta oladi. Ammo "Barsa"ga bu uchun katta pul kerak.
"Yuventus"
Agarda Xoland A seriyaga borishni istasa, u holda "Yuventus" u uchun eng yaxshi manzil bo'ladi. Turin klubi hujumchini 2017 yildayoq sotib olishga harakat qilgan. Ammo, o'shanda "Molde"ning 2 million funtlik talabi "Yuventus"ga og'irlik qiladi. Agarda "Yuventus"da Xoland asosiy maqsad bo'lsa, u holda bu uchun pul yig'ish kerak. Bu pul esa Vlaxovich kabi yulduzlarni sotish orqali yig'iladi.
"PSJ"
"PSJ" 2011 yil qatarliklarlar tasarrufiga o'tkazilgan edi. Shundan beri Parij jamoasida yulduzlar to'p suradi. Messi va Neymar ketdi, Mbappe ham tez orada jamoani tark etadi. Shunday vaziyatda Xoland uchun katta maydon hozirlanadi. "PSJ"ga pul muammo emas. Yagona narsa bu Xolandning xohishi Frantsiyaga yo'nalgan bo'lishi kerak.
"Chelsi"
"Manchester Siti" o'rniga Xoland uchun eng kutilmagan variant bu "Chelsi" bo'ladi. Todd Boeli kelganidan beri bir dunyo pul sarflangan bo'lsa ham, jamoa ishlari hech yurishmayapti. "Chelsi"da ham Xoland xaridiga etadigan pul bor. Ammo futbolchini ko'ndirish kerak. Bu esa oson ish bo'lmaydi.
ISMATOV J.