Kvaratsxeliya, Gavi, Musiala... Eng kam maosh oladigan futbol yulduzlari bilan tanishamiz

So'nggi yillarda transfer narxi va o'yinchilarning maoshlari yanada oshib ketganiga qaramay, maoshi ularning darajasiga to'g'ri kelmaydigan futbolchilar hali ham bor.

Masalan, "Napoli"dan Xvicha Kvaratsxeliya kabi: gruziyalik o'tgan mavsumda jamoaning eng foydali o'yinchilaridan biriga aylandi (barcha turnirlarda 43 ta o'yinda 14+17 samarali harakatlar), Skudettoni yutishda yordam berdi va A Seriyaning eng yaxshi futbolchisi deb tan olindi, ammo u klubda yiliga atigi 1,2 million evro ishlab topadi. Bu jamoadagi 18-ko'rsatkich va shunchaki yuqori darajadagi futbolchi uchun juda kam maosh.

Martin Edegor - yiliga 3,8 million evro

"Arsenal" va Norvegiya terma jamoasining sardori, "kanonirlar"ning eng foydali o'yinchilaridan biri, top-klublar uchun kerakli futbolchi va shunchaki yaxshi yigit jamoadagi hammadan ko'proq pul topishi yoki hech bo'lmaganda ular orasida bo'lishi kerakdek tuyuladi. Buning o'rniga Martin Edegor har mavsumda 3,8 million evro maosh oladi - jamoada eng ko'p maosh oladigan futbolchilar orasida 12-o'rin. Bundan tashqari, Artetaning qolgan shogirdlarida pul bilan bog'liq muammolar yo'q - Saka, Parti va Saliba yiliga 5 milliondan maosh oladi va yangi kelgan Kay Xavertsga esa yiliga 10 million evro to'lanadi.

Ederson - yiliga 3,3 million evro

"Manchester Siti"da asosiy futbolchilar yoshidan qat'i nazar, Uokerdan Fodengacha mustahkam shartnomalarga ega. Minimal: 5 million evro maosh. Ayniqsa, De Bryuyne yoki Xoland kabi qimmatbaho futbolchilar 10 milliondan ko'proq maosh oladi - umuman olganda, Gvardiola jamoasida adolat hukm surayotgandek. Ammo ular kimnidir xursand qilishni unutishdi - Ederson har mavsumda bor-yo'g'i 3,3 million evro oladi. U ko'p yillardan buyon "Siti" darvozasini ishonchli himoya qilayotganini va dunyoning eng kuchli darvozabonlaridan biri ekanligini eslab o'tish joiz.

Gavi - yiliga 3,2 million evro

1 milliard evro tovon puli, katta umidlar, Golden Boy 2022, 100 ta o'yin... va jamoadagi eng past shartnomalardan biri. Biroq, Gavi shunga ham minnatdor bo'lsa kerak - u uzoq vaqt yoshlar shartnomasi bo'yicha o'ynadi va aql bovar qilmaydigan sa'y-harakatlar evaziga "Barselona" yangi shartnomani rasmiylashtirdi, unga ko'ra yigitcha endi 3,2 million evro oladi va jamoada Xavi harakat qilgan 6-raqamda to'p tepadi. Mish-mishlarga ko'ra, vunderkindning maoshi har mavsumda oshib boradi, ammo hozircha "Barsa" asosiy tarkibi darajasidagi futbolchi uchun bu sal pastroq summa.

Mark-Andre ter Shtegen – yiliga 3 million evro

Yana bir darvozabon, o'z imkoniyatlaridan ko'ra past maosh oladi. Ter Shtegen yangi shartnomasi bo'yicha 2028 yilgacha atigi 3 million evro oladi. Ammo ispan OAV yozishicha, Mark yangi shartnomasining dastlabki ikki mavsumidagina yuqoridagi miqdorni oladi, keyin esa maosh ko'tarilib boradi.

Jamol Musiala – yiliga 2,6 million evro

Bir tomondan, 20 yoshda 2,6 million evro olish yomon shartnoma emas. Boshqa tomondan, agar siz "Bavariya"da o'ynasangiz va bir mavsumda barcha turnirlarda 43ta o'yinda 16+16 natija qayd etsangiz, ehtimol siz ko'proq narsaga loyiqsiz. Jamol Musiala uzoq vaqtdan beri Evropaning eng umidli futbolchilaridan biri bo'lib kelgan va "Bavariya" ham kambag'al klub emas. Hujumchi Chupo-Moting zaxira o'yinchisi sifatida yiliga 3,7 million evro olayotgan vaqtda balki Jamolning maoshini oshirish vaqti kelgandir.

Joau Feliks – yiliga 190 ming evro

Yo'q, bu hazil emas. Bir paytlar “Atletiko”ga 127 million evroga tushgan Feliks “Barselona”da soliqlardan keyin yiliga 190 ming evro oladi. Ha, bu uning Premer-ligadagi ko'plab vatandoshlari kabi bir haftalik emas, balki mavsum uchun maosh. Lekin portugaliyalikga achinishning hojati yo'q - Joau kataloniyaliklar safida o'ynash uchun shunday maoshga rozi bo'lgan, chunki u buni orzu qilgan. Qolaversa, u "Atletiko"ga qaytganida va boshqa klubga o'tib ketgan taqdirda butunlay boshqa pul ishlab topishi aniq. Solishtiradigan bo'lsak, Joau o'tgan mavsum uchun 7 million evro ishlab topgan.

Levi Kolvill - 163 ming evro

Levi Kolvill so'nggi yillarda ijara asosida o'ynagan "Chelsi"ning yosh himoyachisi. Bu mavsumda u nihoyat asosiy jamoaga qaytdi, ammo shartnomani yangilashni unutib qo'yishdi go'yo. Yigitcha bir mavsumda 160 ming evrodan sal ko'proq oladi. Taqqoslash uchun, "aristokratlar"ga o'tgan qishda kelib qo'shilgan va hali hamon jamoa uchun rasmiy o'yinlarda foydali harakat amalga oshirmagan Mixaylo Mudrik Kolvilldan 20 barobar ko'proq pul oladi.

Alexandro Balde – 80 ming evro

Alexandro Balde "Barsa" tarkibida Jordi Albani raqobatda yutib chiqib, asosiy tarkib futbolchisiga aylandi. GoldenBoy2023'ga da'vogarlar safiga kirdi va oyiga 3 ming evro maosh oladi. Ehtimol, lateral, printsipial jihatdan, top-5 ligadagi eng kam maosh oluvchi futbolchilardan biri bo'lishi mumkin va bu achinarli. Xabarlarga ko'ra, "Barselona" 19 yoshli futbolchi bilan 2027 yilgacha amal qiladigan yangi shartnoma borasida kelishuvga erishgan. Unda himoyachining qancha maosh olishi borasida ma'lumotlar hozircha yo'q.