«Sug'diyona» FK O'FA huzuridagi viloyat bolalar-o'smirlar hududiy futbol akademiyasi bilan shartnoma imzoladi

Xabaringiz bor, O'zbekiston Professional Futbol Ligasi yangi mavsum oldidan Superliga hamda Pro-liga “A” guruhining barcha ishtirokchi klublari oldiga bir qator talablarni qo'ymoqda. Jumladan, 2019 yildan boshlab Superliga hamda Pro-liga “A” guruhida qatnashishni istagan klub yaxshi holatdagi maydoni bor stadion va o'z akademiyasiga ega bo'lishi shart etib belgilandi.

Kelgusi mavsum uchun allaqachon tayyorgarlikni boshlab yuborgan Jizzaxning “So'g'diyona” futbol klubi O'FA huzuridagi Jizzax viloyati bolalar-o'smirlar hududiy futbol akademiyasi bilan yosh futbolchilarni tayyorlash bo'yicha shartnoma imzoladi. Natijada klub ayrim majburiyatlar bilan bir qatorda ma'lum huquqlarga ham ega ham bo'ldi.

Birinchidan, Jizzax viloyatining asosiy jamoasi viloyatdagi yosh iste'dodlarni to'g'ri yo'nalishda tarbiyalab, ulardan yaxshi saviyadagi professional o'yinchi etishib chiqishida o'z xissasini qo'shish imkoniyatiga ega bo'ladi. Qolaversa, akademiyadan etishib chiqadigan iste'dodli o'yinchilarni o'z safiga jalb etish borasida “So'g'diyona” katta imkoniyatga ega bo'ladi. 

Shu boisdan “So'g'diyona” futbol klubi va O'FA huzuridagi Jizzax viloyati bolalar-o'smirlar hududiy futbol akademiyasi o'rtasida yosh futbolchilarni tayyorlash bo'yicha tuzilgan shartnoma kuchga kirganidan boshlab, klub oldiga qo'yilayotgan asosiy talablardan biri – akademiya bo'yicha talabni bajargan deya sanaladi.