O'zbekistonda zamonaviy beshkurashni rivojlantirish yo'lida bir nechta sport turlari federatsiyalari yaqindan hamkorlik qiladi

Xabaringiz bor, dekabr oyi boshida O'zbekiston zamonaviy beshkurash federatsiyasiga yangi rahbariyat saylangan va tashkilot oldiga tegishli vazifalar belgilab berilgandi. Bu borada federatsiyada ish qizg'in kechmoqda.

Bugun, 26 dekabr kuni Milliy olimpiya qo'mitasida zamonaviy beshkurash sportini rivojlantirish, ommalashtirish maqsadida O'zbekiston engil atletika, qilichbozlik, yilqichilik va ot sporti, suzish hamda o'q otish sporti federatsiyalari o'rtasida o'zaro hamkorlik va sherikchilik bo'yicha memorandum imzolash marosimi tashkil etildi. Tadbirda yuqorida sanab o'tilgan federatsiyalar vakillari, shuningdek, Milliy olimpiya qo'mitasi mutasaddilari ishtirok etishdi.

Sir emaski, zamonaviy beshkurash oson bo'lmagan sport turlaridan biri hisoblanadi. Chunki, ushbu sportda atletlar beshta yo'nalish – yugurish, qilichbozlik, ot sporti, suzish hamda o'q otish bo'yicha kurash olib boradilar. Sportchi mazkur yo'nalishlarning har biriga alohida tayyorgarlik ko'rishi lozim. Buning zamirida esa tinimsiz mehnat, katta mashaqqat yotadi. Shu sababdan ham, beshkurashni rivojlantirish faqatgina bir federatsiyaga bog'liq emas. Bugungi tadbir davomida hamjihatlikda ish olib borish, beshkurash talablariga javob bera oladigan atletlarni saralab olish, tajribali murabbiylardan iborat kengash tuzish va boshqa masalalar muhokama qilindi. O'z navbatida federatsiyalar vakillari hamkorlik qilishga, o'zlari tomonidan amaliy yordam ko'rsatishga tayyor ekanliklarini ma'lum qildilar.

Shundan so'ng tadbirning asosiy qismi – memorandum imzolash marosimi tashkil qilindi.

Ma'lumot o'rnida, Tokio 2020 Olimpiadasiga zamonaviy beshkurash bo'yicha Osiyo qit'asi vakillari uchun 5 ta litsenziya ajratilgan. O'zbekiston ana shu beshta yo'llanmadan biriga ega chiqish uchun etarli salohiyatga ega. Shunday ekan, 2019 yilning noyabr oyida o'tkaziladigan litsenzion musobaqada yuqorida sanab o'tilgan federatsiya mas'ullari, murabbiy va sportchilarga omad, muvaffaqiyat va albatta kuch-quvvat tilab qolamiz.