Mikel Arteta: «Siti» bizdan ancha kuchli edi...»

«Arsenal» bosh murabbiyi Mikel Arteta hozir ham o'zi, ham jamoasi uchun ulkan ijobiy lahzalarga to'la mavsum-2022/2023 haqida o'ylab, yozda qanday yangiliklarga qo'l urish mumkinligini o'ylayotgan bo'lsa, ajabmas.

Ha, ispaniyalik mutaxassis jamoasi mavsumning katta qismida muqarrar chempiondek ko'rindi, biroq yakunda hammasi boshqacha tugadi. Qisqasi, «kanonirlar» orada bir necha qiyin haftaga yuz tutishdi va dahshatnamo «Manchester Siti» oxir-oqibat, jadvalda «to'pchilar»ni ortga surib, qatorasiga 3-marta chempionlikni tantana qildi. «Arsenal»ga quvnoqlikni qaytargan Arteta endi butun chempionat masofasini yaxlit holda chuqur tahlil qilishi aniq. Lekin u hozirning o'zida xulosa chiqarmoqda: «Arsenal»ning ham maydon, ham uning tashqarisida erishgan ajoyib yutuqlari - hamma uchun katta «syurpriz». Yosh murabbiy bu borada haq. Zero, «kanonirlar» o'tgan yilning avgust oyida «Kristal Pelas»ga qarshi o'yin bilan startga chiqqan pallada hech kim ulardan bunday yorqinlikni kutgan emasdi.

- Janob Mikel, aytingchi, jamoangiz joriy mavsum muvaffaqiyatga erishdimi yoki omadsizlikka yuz tutdi?

- Chempionlar Ligasi yo'llanmasini finishga 5-6 tur qolgan palladayoq rasmiylashtirdik va turnir jadvalida 2-o'rinni band etdik. Asosiysi, ko'plab futbolchilarni tarbiyaladik, ularni yangi darajaga olib chiqdik. Qisqasi, yigitlarimiz jamoa qatori o'sishdi va ulkan natijaga katta hissa qo'shdilar. Shuningdek, muxlislarimiz bilan ham kuchli munosabat o'rnatdik, o'rtadagi aloqalarni rivojlantirdik, jamoa atrofida o'ziga xos muhit yaratdik. Oddiy aytganda, jamoa ega bo'lgan imkoniyatlar, qobiliyatlar va resurslarni hisobga olsak, mavsum kutilganidan ko'proq ijobiy holatlar taqdim etganini ko'rish mumkin. Shunday ekan, ishtirokimiz muvaffaqiyat iborasini ishlatishga arziydi. Hammasi qaysi nuqtai nazardan baho berishga bog'liq. Naq 248 kun davomida APL turnir jadvali cho'qqisida turib, yakunda chempionlikdan mosuvo qolganimiz esa, vaziyat taqozosi. Tan olish kerak, «Siti» bizdan ancha kuchli ekanligini isbotladi. Ha, shuncha yurish yakuniy g'alaba uchun etarli bo'lmadi. Qo'ldan kelganicha harakat qilganimiz o'z-o'zidan tushunarli, faqat yakunda bir necha xatolarga yo'l qo'ydik va ular qimmatga tushdi. Ammo haqiqat shuki, hammadan tabrik olishga haqli bitta jamoa bor - «Manchester Siti». Shuningdek, Xosep Gvardiola va uning shtabi ham qutlovlarga munosib. Butun chempionat masofasini olsak, «shaharliklar» bizdan izchilroq ko'rindilar. Shunday ekan, «Siti»ni samimiy tabriklash kerak, shuning barobarida raqib mavsum davomida bajargan ish ko'lamidan xulosa olib, o'z ritmingizni yanada yaxshilash, oqsagan jihatlarni to'g'rilash haqida bosh qotirish muhim. Futbol talabi oddiy - yangi darajaga ko'tarilishni istaysizmi, marhamat, o'z o'yiningizni imkon qadar kuchaytiring.

- Chempionlikdan mosuvo qilgan eng og'riqli burilish nuqtasini ayta olasizmi?

- «Enfild»da 2:0 hisobida oldinda bora turib, 90-daqiqada g'alabani qo'ldan chiqardik - alamli durang. Shundan so'ng «Vest Xem»ga qarshi uchrashuvning dastlabki 20 daqiqasida 2ta gol urdik, davomi penalti, yana alamli yakun. «Sautgempton» bilan bahsda esa avvaliga 2ta gol qo'yib yubordik, shunga qaramay, g'alabaga juda yaqin keldik, amalda esa 3:3 hisobiga ko'ndik. Oxir-oqibat, «Siti»ga qarshi o'yin hal qiluvchi ahamiyatga ega bo'ldi. Qaytaraman, raqib bizdan ancha kuchli edi. Orqaga nazar tashlasak, agar «Enfild»da g'alaba qozonib, «Vest Xem» va «Sautgempton»dan ustun kelib ham, 2-o'ringa tushishimiz mumkin edi. Oxir—oqibat, chempionlikka intilgan jamoa asosiy raqib bilan yuzma-yuz kelganida, uni engishi shart. Chunki bunday o'yin bahosi 6 emas, 12 ochkoga teng bo'ladi ba'zan.

- Xo'sh, yozda tarkibni kuchaytirishga e'tibor qaratasizmi?

- O'ylaymanki, hozir sayohat boshida turibmiz. Birinchidan, ajoyib poydevor bor, ikkinchidan, raqobatbardoshlik sifati oshdi, chindan ham. Endi qayta tiklanish tugmachasini bosish va barchasini yangitdan boshlash talab etiladi. Maydonda yanada tezroq harakatlanishimiz, qat'iyatni oshirishimiz, shafqatsizroq bo'lishimiz kerak. Chunki hozir daraja o'lchovi ancha katta, maydon esa juda kichik. Shuning uchun o'yinga aql bilan yondashish ham o'ta muhim.

«ARSENAL» RAHBARIYaTI ARTETADAN MAMNUN

London klubi Mikel Artetaga maoshi oshirilgan yangi shartnoma taklif qilishga ulgurdi. Football Transfers xabarida aytilishicha, «kanonirlar» ispaniyalik mutaxassis bilan hamkorlik muddatini 2028 yilning iyunigacha uzaytirish niyatidalar. Aytish joiz, Artetaning amaldagi shartnomasi 2025 yilning yozigacha mo'ljallangan. Demak, rahbariyat bosh murabbiy ishidan mamnun. Ma'lumot uchun, Arteta «Arsenal» boshqaruvini 2019 yilning dekabrida qo'lga olgandi. «Kanonirlar» joriy mavsum uning qo'l ostida APLda 2-o'rinni naqd qilib, 7 yillik tanaffusdan so'ng ChL yo'llanmasini qo'lga kiritishdi.