Turg'unboevning diskvalifikatsiyasi ertaga yakunlanadi

Shu yilning fevral oyida O'FA tomonidan davralar oralig'idagi transfer “darchasi” ochilgunga qadar, ya'ni 9 iyulgacha futbolga oid har qanday faoliyatdan chetlatilgan "Navbahor" yarim himoyachisi Azizbek Turg'unboevning diskvalifikatsiya muddati ertaga o'z yakuniga etadi. Erkin agent maqomidagi Turg'unboevning 2-davrani “Navbahor” tarkibida o'tkazishi ehtimoli yuqori.

Xabaringiz bor, “lochinlar” ertadan o'quv-mashg'ulot yig'inini Toshkentda boshlashadi. Azizbek Turg'unboev katta ehtimol bilan ushbu yig'inga qo'shiladi.

O'tgan mavsumda “Navbahor” etakchisiga aylangan futbolchi borasida to'liqroq to'xtaladigan bo'lsak, Azizbek Turg'unboev 1994 yilning 1 oktyabrida Namangan viloyatining Pop tumani, To'da qishlog'ida tug'ilgan. Futbol bilan 7 yoshidan shug'ullana boshlagan. Millionlar o'yini sir-asrorlarini dastlab murabbiylar -  Ilhom Abduqodirov va Xurshid Yo'ldoshevdan o'rgangan. Yarim himoya chizig'ida to'p tepadi. 2014 yildan “Navbahor”da. Jamoadagi debyutini 2015 yilgi mavsumda o'tkazgan. Shu kungacha “lochinlar” tarkibida 72ta o'yinda maydonda 4967 daqiqa harakat qilib, raqiblar darvozasiga 15ta gol urgan hamda 7ta golga assistentlik qilgan. Ta'kidlash joizki, 15 goldan bittasini penaltidan urgan.

“Navbahor” PFK matbuot xizmati.