Shveytsariyalik futbolchi ayol ko'lda yo'qolib qoldi

«Yang Boyz» va Shveytsariya terma jamoasi ayol futbolchisi Floriana Ismoiliy Italiyaning Komo ko'lida yo'qolib qoldi.

Shveytsariyaning Blick gazetasi tarqatgan xabarga ko'ra, Ismoiliy mazkur ko'lda dugonasi bilan dam olayotgan bo'lgan. Ular motorli qayiqni ijaraga olib, ko'l ichiga qarab 700 metr suzib borishgan va ko'zdan yo'qolishgan. Mahalliy vaqt bilan taxminan 16:00da Floriana suvga sakragan va qaytib chiqmagan. Ko'lning bu joydagi chuqurligi 100 metrni tashkil qilgan.

Bu borada «Yang Boyz» quyidagicha rasmiy bayonot berdi:

«Yang Boyz» rahbariyati futbolchimiz Floriana Ismoiliy shanba kuni Komo ko'lidan yo'qolib qolganidan xabar topdi. Politsiya tomonidan qidiruv ishlari olib borilmoqda. Vaziyatdan xavotirga tushdik. Barchasi muvaffaqiyatli yakunlanishidan umidni uzmadik.

Biz Ismoiliyning oilasi bilan yaqin aloqada bo'lib turibmiz. Bundan ortiq ma'lumot bera olmasligimizni to'g'ri qabul qilasiz, degan umiddamiz. Qandaydir ma'lumot olsak, bu haqda sizlarni xabardor qilamiz».

Floriana Ismoiliy 24 yoshda. U 2011 yildan beri «Yang Boyz» tarkibida o'ynamoqda. Shveytsariya terma jamoasi safida u 33ta o'yin o'tkazgan.