Amerika kubogi-2019. Argentina yarim finalga chiqdi

Amerika kubogi musobaqasida ikkinchi yarim finalchi jamoaning nomi aniq bo'ldi. Argentina terma jamoasi chorak final bosqichida Venesuelani mag'lub etishga muvaffaq bo'ldi.

"Albiseleste", xuddi Qatar bilan o'yinda bo'lganidek, Lautaro Martines tomonidan urilgan tezkor gol evaziga hisobni ochdi. U tovoni bilan to'pni darvozaga joylab qo'ydi. Argentina o'yin davomida ko'p vaziyatga ega bo'lmasa-da, "Inter" hujumchisi yana bir marta raqib darvozasini ishg'ol qilishi mumkin edi.

Ikkinchi bo'limda venesuelaliklar bosimni oshirib borishdi, ammo Argentina tashkil etilgan qarshi hujumlarning birini gol bilan yakunlab, o'yin taqdirini hal qildi. Bu vaziyatda davrozabon Serxio Agueroning zarbasini qaytargan bo'lsa, Lo Chelso qaytgan to'pni darvozaga joylab qo'ydi.

Shu tariqa, argentinaliklar yarim final yo'llanmasini qo'lga kiritishdi. Jamoa final yo'llanmasi uchun Braziliyaga qarshi maydonga chiqadi.

Amerika kubogi-2019, chorak final
Venesuela – Argentina 0:2 (0:1, 0:1)
Gollar: 0:1 – 10 Martines, 0:2 – 74 Lo Chelso.
Venesuela – Farines, Ernandes, Chanselor, del Pino Mago (Soteldo, 56), Rosales (Seyxas, 83), Moreno, Murilo, Errera, Rinkon, Machis (Martines, 71), Rondon.
Argentina – Armani, Foyt, Petstselya, Otamendi, Talyafiko, Paredes, de Paul, Akunya (Lo Chelso, 68), Messi, Martines (Di Mariya, 64), Aguero (Dibala, 85).
Ogohlantirishlar: Rinkon (12), Errera (15), Martines (16), Akunya (42), Rondon (44), Soteldo (90).