Doston Tursunov: «O'zbekiston bilan JChda ishtirok etish niyatim bor»

O'zbekiston milliy terma jamoasi himoyachisi Doston Tursunov Osiyo Kubogi-2019 oldidan Yaponiyaning “Renofa Yamaguchi” klubi bilan shartnoma tuzgan edi. 

Mana yarim yildirki, hamyurtimiz Yaponiya J2 ligasida faoliyat olib bormoqda. Sekin-asta milliy terma jamoamizda ham o'z o'rnini topib borayotgan futbolchi hozirga qadar “Renofa Yamaguchi” tarkibida 12 ta uchrashuv o'tkazishga ulgurdi.

24 yoshli himoyachi O'FA matbuot xizmatiga Yaponiyadagi faoliyati qanday ketayotgani xususida gapirib berdi: 

- Yapon futboliga ancha moslashib ulgurdim, desam bo'ladi. Bu erda J1 liga kabi J2 ligada ham uchrashuvlar ancha shiddatli kurashlar ostida kechadi. J2 ligada jami 22 ta klub ishtirok etadi. Har bir klub safida saviyali legionerlar to'p surishadi. Uchrashuvlarda temp ancha yuqori, futbolchilar ham jismonan, ham texnik jihatdan ancha kuchli. Tarkibga kirish uchun raqobat yuqori. Lekin men ham o'z mahoratimni ishga solishga harakat qilyapman.

Yaponiya chempionatidan, xususan J2 ligasi jamoasidan ham yuqoriroq ligalarga yo'l olish mumkin. Masalan, men ayni paytda faoliyat olib borayotgan “Renofa Yamaguchi” klubi yaqin vaqtlar ichida Yaponiya J1 ligasiga hamda Evropaning ayrim chempionatlariga o'yinchilar etkazib berdi. Men ham aynan shu sababdan mazkur klub safiga kelib qo'shilganman. Niyatim – bu erda o'z mahoratimni namoyish etib,  kuchliroq klub tarkibidan joy olish. Qolaversa, milliy terma jamoamizning ham asosiy futbolchilaridan biriga aylanish. Anzur Ismoilov, Islom To'xtaxo'jaev va Egor Krimets kabi tajribali o'yinchilardan ko'p narsalarni o'rganishga harakat qilyapman. Nasib etsa, O'zbekiston milliy terma jamoasi tarkibida Qatarda o'tadigan Jahon chempionatida maydonga tushmoqchiman, - dedi futbolchi.