«Lokomotiv» va «AF Sports Reactive» o'zaro hamkorlik to'g'risida memorandum imzoladi

Har jabhada professionallik sari intilayotgan Toshkentning «Lokomotiv» klubi bundan buyon dunyoga mashhur bo'lgan Germaniyaning «AF Sports Reactive» kompaniyasi bilan yaqindan hamkorlik qiladi.

Bugun «Lokomotiv» stadioni matbuot anjumanlari zalida ikki tomon o'rtasida o'zaro hamkorlik to'g'risida memorandum imzolashga bag'ishlangan tadbir bo'lib o'tdi. Unda «Lokomotiv» PFK bosh direktor o'rinbosari To'labek Akramov, jamoa sardori Islom To'xtaxo'jaev, «AF Sports Reactive» kompaniyasi rahbari, yuridik fanlari nomzodi Farid Zakirov va shuningdek bir qator OAV vakillari ishtirok etishdi. Tadbirda har ikki tomon vakillari ham ushbu hamkorlikning o'zaro manfaatli ekanini ta'kidlashdi.


«Lokomotiv» PFK bosh direktor o'rinbosari To'labek Akramov «AF Sports Reactive» bilan hamkorlik «Lokomotiv» jamoasi o'yinlari targ'ibotini yanada kuchaytirish hamda klub brendini yanada kengroq yoyish imkonini berishini aytib o'tdi. «AF Sports Reactive» kompaniyasi rahbari Farid Zakirov esa futbol bo'yicha O'zbekiston chempioni bilan yaqin aloqalar yo'lga qo'yilayotganidan juda mamnun ekanini bildirdi.

Tadbir yakunida har ikki tomon o'zaro hamkorlik xususida memorandum imzolashdi. Unga ko'ra, endilikda «AF Sports Reactive» «Lokomotiv» bilan hamkorligi doirasida barcha toifadagi futbolchilarga horijdan jamoalar qidirish, ularning o'rtasida vositachi bo'lish, shuningdek, futbolchilarning huquqlarini yuridik tomondan himoya qilish ishlari bilan shug'ullanadi.

Qayd etish kerak, bu kompaniya jahonga mashhur bo'lgan ko'plab top-jamoalar bilan hamkorlik qiladi. Bu «Lokomotiv» klubining oldinga tashlagan qadami deb aytsak bo'ladi.