Superliga va A Pro-liga klublari matbuot kotiblari uchun seminar bo'lib o'tdi

Kecha O'zbekiston Professional futbol ligasi tomonidan Superliga hamda A Pro-liga ishtirokchi klublari matbuot xizmati rahbarlari uchun maxsus seminar tashkil etildi.

Ayni paytda Superliga, Pro-liga hamda kubok bellashuvlari natijalari va o'yin atrofidagi voqealar haqida batafsil ma'lumot berish, ishqibozlarni sevimli jamoalari hayotiga oid yangiliklardan hamisha tezkorlik bilan boxabar etib borishda klublar matbuot xizmatlarining o'rni beqiyos, albatta. So'nggi yillarga kelib klublarimiz matbuot xizmatlari faoliyati ancha o'sdi. Hozirgi kunga kelib klublarning matbuot xizmatlari ancha barqaror ish olib bormoqda.

O'zbekiston Professional futbol ligasi har mavsum avvalida, o'rtasida va mavsum yakuniga etgach klublar matbuot xizmatlari uchun seminarlar tashkil etib kelmoqda. Seminarlar davomida mavjud yutuq va kamchiliklar muhokama etilib, ish faoliyatini yanada samarali tashkil etish bo'yicha takliflar o'rtaga tashlanmoqda.

Kecha bo'lib o'tgan seminar davomida ham Superliga va A Pro-liga klublari matbuot xizmatlarining mavsum boshidan buyon amalga oshirib kelayotgan faoliyati tahlil etildi. Matbuot xizmati rahbarlari o'z hamkasblari faoliyatidagi yutuq va bartaraf etish lozim bo'lgan jihatlarni qizg'in muhokama etishdi. 

Kunning birinchi yarmida seminar tashkil etilgan bo'lsa, tushdan so'ng barcha klublar matbuot xizmati rahbarlari O'zbekiston va KXDR terma jamoalari o'rtasidagi xalqaro o'rtoqlik uchrashuvini bevosita kuzatib borishdi va o'yindan keyingi matbuot anjumanida ham qatnashishdi.