Futbolchining ahmoqligi tufayli Koreya o'smirlar jamoasidan sovrin olib qo'yildi

Xitoyning Chendu shahrida an'anaviy Panda Cup musobaqasi o'tkazildi. O'smirlar (U17) jamoalari ishtirokidagi turnirda Janubiy Koreya yoshlar termasi g'olib chiqdi.

Shu yilning 25-29 may kunlari guruh tizimi shaklida o'tkazilgan musobaqada koreyalik yoshlar Tailand, Yangi Zelandiya va Xitoyni mag'lub etishdi.

G'alabani nishonlash paytida Janubiy Koreya o'smirlar jamoasi futbolchilaridan biri Kubokning ustiga oyog'ini qo'yib, suratga tushdi. Bu holat Chendu futbol assotsiatsiyasiga yoqmadi va Osiyo futbol konfederatsiyasiga shikoyat yo'lladi. Shu tariqa, Janubiy Koreya o'smirlar termasi sovrindan mahrum qilindi.

Koreya futbol assotsiatsiyasi maktub orqali tashkilotchilardan uzr so'radi. Terma jamoa futbolchilari esa boshlari egilgan holda uzr so'ralgan videoni yozib olib, tashkilotchilarga taqdim qildi.