FIFA Argentina futbol assotsiatsiyasiga qarshi ish ochdi

FIFA Argentina terma jamoasiga nisbatan intizomiy ish ochdi.

Mundo Deportivo nashrining xabariga ko'ra, Argentina futbol assotsiatsiyaga qarshi ish Lionel Messi («Darajasi to'g'ri kelmaydigan hakamni o'yinga tayinlamaslik kerak» degani uchun) va darvozabon Emiliano Martines (hakamni JCh—2022 hakamlari ichida eng yomoni deb atagani uchun) Niderlandiyaga qarshi o'yin bosh hakami Mateu Laos sha'niga nomaqbul so'zlarni ishlatgani uchun ochilgan.

Shuningdek, o'yin vaqtida sodir bo'lgan voqealar ham ko'rib chiqiladi. Gap sportchiga xos bo'lmagan xatti-harakatlar haqida ketmoqda — xavbek Leandro Paredes ataylab raqib zaxira o'rindig'i tomon to'pni tepib yubordi, shundan so'ng futbolchilar o'rtasida janjal kelib chiqdi, himoyachi Nikolas Otamendi va yana bir nechta futbolchi penaltilar seriyasidan so'ng Niderlandiya terma jamoasi yonidan o'tayotganda ularni masxara qilib ketgan.

Ushbu ish bo'yicha qaror yaqin orada e'lon qilinadi. Argentina terma jamoasi 13 dekabr, seshanba kuni JCh—2022 yarim finalida Xorvatiyaga qarshi maydonga tushadi.

Manba: daryo.uz