Ikki dzyudochimiz Orenburgdagi musobaqada sovrindor bo'lishdi

18-19 may kunlari Rossiyaning Orenburg shahrida dzyudo bo'yicha Evropa ochiq kubogi musobaqasi bo'lib o'tdi. Mazkur turnirda ishtirok etgan O'zbekiston terma jamoasining 2 nafar vakili sovrinli o'rinlarni qo'lga kiritdi.

Eng og'ir vazn toifasida bahs olib borgan polvonimiz Alisher Yusupov (+100 kg) barcha raqiblarini mag'lub etib, oltin medalni qo'lga kiritgan bo'lsa, -81 kilogarmm vazn toifasida harakat qilgan Muso Sobirov bronza medali bilan taqdirlandi.

Ta'kidlash joiz, ushbu musobaqa Tokio Olimpiadasiga reyting ochkolarini taqdim etgani uchun ham o'zida 20 ga yaqin mamlakat vakillarini jamladi. Yusupov bu g'alabadan keyin jahon reytingiga 100, Olimpiada uchun 50 reyting ochkosini, Sobirov esa mos ravishda 50 va 25 ochkolarini qo'lga kiritdi. Ushbu natija bilan dzyudochilarimiz umumjamoa hisobida Rossiya, Belarus va Frantsiya terma jamoalaridan keyin to'rtinchi o'rinni egallashdi.