O'FA ekspertlari Superliganing har bir uchrashuvini tahlil qilyapti

Kecha Superliga 8-turidan o'rin olgan ikkita uchrashuv bo'lib o'tdi. "Dinamo" - AGMK jamoalari o'rtasidagi o'yinni Valentin Kovalenko boshchiligidagi hakamlar boshqarib borgan bo'lsa, "Paxtakor" - "Navbahor" uchrashuvida Zokir Qodirov guruhi ishladi.   O'zbekiston futbol assotsiatsiyasida tashkil etilgan ekspertlar guruhi mazkur o'yinlarni sinchiklab o'rganib chiqishdi va tegishli xulosalar berishdi. Mazkur ekspertlar guruhida O'FA Hakamlar va nazoratchilar departamenti mutaxassislari qatorida FIFA va OFK instruktori Farhod Abdullaev ham borligini ta'kidlab o'tish zarur.   Ekspertlar guruhi samarqandliklarning kichik hisobdagi g'alabasi bilan yakuniga etgan "Dinamo" - AGMK uchrashuvidagi hakamlar harakatini ijobiy baholadi. Jumladan, Valentin Kovalenko tomonidan ikkita vaziyatda kiritilgan gol "o'yindan tashqari holat" sifatida baholanib, gollar inobatga olinmadi. Quyidagi lavhalar orqali Kovalenkoning bu qarorlari to'g'ri ekaniga ishonch hosil qilish mumkin.


  "Paxtakor" - "Navbahor" o'yinida ishlagan bosh hakam Zokir Qodirov hamda laynsmen Ruslan Samandarov bo'yicha esa ekspertlar guruhining xulosasidan kelib chiqib qaror qabul qilindi. Zokir Qodirov 3ta o'yinga, Ruslan Samandarov esa nomuayyan muddatga Superliga o'yinlaridan diskvalifikatsiya qilindi. Zokir Qodirov boshchiligidagi hakamlar guruhining o'yindagi xatolari evaziga uchrashuv tizgini qo'ldan chiqib ketgani va maydonda futbolchilar o'rtasida ziddiyatlar yuzaga kelganini ta'kidlash zarur.   O'FA ekspertlar guruhi har bir o'yinni ana shunday sinchiklab o'rganib, hakamlar guruhining faoliyati bo'yicha tegishli xulosalar berib borishadi. Bundan ko'zlangan asosiy maqsad hakamlik amaliyotidagi xatolarni kamaytirish va uchrashuvlar shaffofligini oshirishdan iborat.