Gimnastikachilar bahsi

Toshkentda badiiy gimnastika, trampolin va akrobatika yo'lakchasida sakrash bo'yicha oliy o'quv yurtiga yo'llanma beruvchi chempionat yakunlandi.   Badiiy gimnastika bo'yicha ko'pkurash bahslarida Diyora Burhonxo'jaeva (Toshkent) birinchi o'rinni qo'lga kiritdi. Shuningdek, musobaqada samarqandlik Maftuna Quvondiqova hamda nukuslik Dilafruz Solieva shohsupaga ko'tarildi.   Alohida predmetlar bo'yicha o'tgan bellashuvlarning xalqada mashq bajarish bahslarida D.Burhonxo'jaeva, koptokda D.Ashurova, bulavada D.Solieva, tasmada M.Quvondiqova g'alaba qozondi.   Trampolin bo'yicha o'tgan bellashuvlarda Bobur Ahmadaliev, Diyora Sayfiddinova, sinxron yo'nalishida Maxsud Sobirov va Bunyod Yo'ldoshev tandemi g'alaba qozondi. Ayollar o'rtasida esa Kimyo Mamajonova hamda Zulfizar O'lmasboeva juftligi g'olib bo'ldi.   Akrobatika yo'lakchasida sakrashda Mashrab Nazaraliev va Sabina Xudoeva shohsupaning eng yuqori pog'onasidan joy oldi.