Bogdan Milich: «Bunday ishqibozlar qarshisida har qanday raqibni tiz cho'ktirish mumkin»

“Andijon” klubining chernogoriyalik hujumchisi Bogdan Milich “Turon”ga qarshi chempionat doirasidagi bellashuvda g'alabaga munosib hissasini qo'sha oldi. Tajribali futbolchi mazkur o'yindan olgan taassurotlarini quyidagicha bildirdi.

“Bizga bu o'yinda ochkolarni qo'lga kiritish juda muhim edi. Asosiysi, Superligaga chiqish yo'lidagi bosh raqibni dog'da qoldirdik. To'g'ri, o'yinning qaysidir jabhalarida xatolarga yo'l qo'ygan bo'lishimiz mumkin. Buni tahlil davomida ko'rib chiqamiz.

Endi aynan Kubok doirasida yana “Turon”ga qarshi maydonga tushishga hozirlik ko'ramiz. Kubok uchrashuvida ham bu raqibni dog'da qoldirishga harakat qilamiz.

Uchrashuvning oxirgi daqiqalariga kelib bizda charchoq alomatlari sezilib qoldi. Shu bois ikki-uch marta xatolarga yo'l qo'ydik. Gol o'tkazib yuborishimiz ham hech gap emasdi. Baxtimizga omad bizga kulib boqdi.

Bizga ishqibozlar juda katta yordam berishdi. Men jiddiy aytyapman. Stadiondagi muhit O'zbekistondagi eng yaxshisi. Haligacha bunday ishqibozlarni Superligada ham, pro ligada ham ko'rmagandim. Qanday ta'riflashni ham bilmayman.

Shunchaki, stadiondagi muhit ta'riflab bo'lmas darajada. Ular so'nggi soniyalargacha bizni qo'llab-quvvatlashdi. Har bir uchrashuvda yaxshi o'yin ko'rsatishimiz hamda g'alaba qozonishimiz uchun to'liq qo'llab-quvvatlab kelishyapti va ular bizning 12-o'yinchimiz. Darhaqiqat bizga kuch bag'ishlashdi. Bunday ishqibozlar qarshisida har qanday raqibni tiz cho'ktirish mumkin”, - dedi Milich.

"Andijon" matbuot xizmati.