Ajoyib transfer siyosati. "Monako"ning qimmatga sotgan yulduzlari

 "Monako" uzoq tarixga ega klub. Biroq, monegasklar nafaqat futboldagi yutuqlari bilan mashhur. Ular transfer bozorida yaxshi ishlay olishlari bilan ham mashhur bo'lishdi. Vaqti-vaqti bilan bu klub o'zi uchun juda foydali shartnomalar tuzadi. Ulardan ba'zilari rekordlarni yangilamoqda. Shuningdek klub grand jamoalarga yaxshigina summaga futbolchi sotishni ham biladi.

Bernardo Silva
Qaerga: "Manchester Siti"
Qanchaga: 50 million evro

Silva "Monako"da 3 yil o'ynagan. Avvaliga monegasklar yarim himoyachini "Benfika"dan ijaraga olishgan, keyin esa mavsum o'rtasida 15,75 million evro evaziga sotib olishgan. 2017 yilning iyulida "Monako" portugaliyalikni "Manchester Siti"ga 50 millionga sotgandi. Bernardu "knyazlik klubi" uchun 147 ta o'yin o'tkazgan.

Benjamin Mendi
Qaerga: "Manchester Siti"
Qanchaga: 57,5 million evro

Mendi Silvadan keyin «Manchester Siti»ga bordi. Boz ustiga, frantsuz “shaharliklar”ga portugaliyalikdan ham qimmatroqqa tushdi. 2016 yilning yozida “Monako” himoyachini “Marsel”dan 13 million evroga sotib olgandi. Oradan bir yil o'tib monegasklar uni 57,5 millionga "Manchester Siti"ga sotishdi. Bu safar Gvardiola xato qildi. Mendi "shaharliklar"ga foydadan ko'ra ko'proq muammolarni keltirdi. Frantsiyalik futbolchi qonun bilan bog'liq muammolar tufayli deyarli bir yil maydonga tushmadi. 

Entoni Marsyal

Qaerga: "Manchester Yunayted"
Qanchaga: 60 million evro

Marsyalning sotilishi "Monako" uchun juda muvaffaqiyatli kelishuv bo'lgan. 2013 yilning yozida monegasklar “Lion” yoshlar jamoasidan 5 million evro evaziga futbolchi sotib olishdi. 2 yildan so'ng ular futbolchini "Manchester Yunayted"ga 60 millionga sotishdi. Kelgusi mavsum frantsuz uchun "Manchester Yunayted"dagi sakkizinchi mavsum bo'ladi, ammo u klubning asosiy futbolchisiga aylangani yo'q. Erik ten Xag bilan hamkorlik Marsyalning "Old Trafford"da o'ynashiga so'nggi umiddir. Aks holda uning "MYu"ni tark etishi muqarrar. Mankunianliklar allaqachon yangi hujumchi izlamoqda.

Toma Lemar
Qaerga: "Atletiko"
Qanchaga: 72 million evro

"Monako" uchun yana bir muvaffaqiyatli kelishuv. 2015 yilning yozida monegasklar Lemarni "Kan"dan 4 million evroga sotib olishgandi. 3 yildan so'ng ular yarim himoyachini "Atletiko"ga 72 millionga sotishdi. Madridda frantsuz uchun hammasi yaxshi ketyapti, deb bo'lmaydi. Futbolchi o'tgan mavsumda yaxshi o'ynadi, biroq oldingi mavsumlarda ham o'yin vaqtida, ham o'yin amaliyotida muammolar bor edi. O'tgan mavsumda Lemar 4 ta gol urdi va 5 ta golli uzatmani amalga oshirdi. Bu uning "Atletiko Madrid"dagi eng yaxshi ko'rsatkichidir. Shu bilan birga, yarim himoyachi hali ham “Monako”dagi sermahsullika yaqin kelmagan. Shunga qaramay, “matraschilar” futbolchi bilan shartnomani uzaytirmoqchi.

Xames Rodriges
Qaerga: "Real Madrid"
Qanchaga: 75 million evro

Hames "Monako"da atigi 1 mavsum o'tkazdi. 2013 yilning yozida monegasklar yarim himoyachini "Portu"dan 45 million evroga sotib olishgandi. Oradan bir yil o'tib 75 million evaziga "Real"ga o'tdi. Kolumbiyalik o'zining birinchi mavsumida "blankoslar" safida 13 ta gol urdi va 13 ta golli uzatmani amalga oshirdi. Ammo Hames "qirollik klubi"da porlamadi. Zinedin Zidan kelishi bilan Ispaniya poytaxtida kolumbiyalik uchun qorong'u kunlar keldi. Hozir yarim himoyachi Qatarning "Al-Rayyan" jamoasida o'ynaydi, ammo Evropaga qaytish istagini bildirmoqda. 

Orlen Tchuameni
Qaerga: "Real Madrid"
Qanchaga: 80 million evro

"Monako" uchun Tchuameni shartnomasi hali yangi. Monegasklar yarim himoyachini 2020 yilning yanvarida 18 million evro evaziga "Bordo"dan sotib olgandi. Shu yilning iyun oyida "Monako" futbolchini "Real"ga 80 million evro evaziga sotgandi. Yana 20 million monegasklar bonus olishlari mumkin. Bu transfer o'zini oqlashi kerak. Tchuameni kelgusida rivojlanish uchun barcha fazilatlarga ega, istiqbolli yarim himoyachi hisoblanadi. Karlo Anchelotti qo'l ostida yosh frantsuz muvaffaqiyatga erishishi kerak.

Kilian Mbappe
Qaerga: "PSJ"
Qanchaga: 180 million evro

Mbappening transferi "Monako" tarixidagi eng muvaffaqiyatli sotuvi bo'ldi. Kilian hali yoshligida monegasklar akademiyasiga qo'shilgan. U erda 4 yil o'tkazdi, shundan so'ng avvaliga ijaraga, keyin esa doimiy ravishda "PSJ"ga o'tdi. Parijliklar yosh hujumchini 2018 yilning yozida sotib olishgan edi. Transfer summasi 180 million evroni tashkil qildi. Bu "Monako" uchun eng katta sotuv va "PSJ" uchun ikkinchi eng qimmat transfer. Bundan ko'proq parijliklar faqat Neymar uchun to'lashgan - 222 million evro. 

Manba: www.stadion.uz.