"Vest Xem" Kostich uchun 15 million bermoqchi, "Ayntraxt" 20 million evro so'ramoqda

Sky Sports xabariga ko'ra, "Vest Xem" Frankfurtning "Ayntraxt"iga yarim himoyachi Filip Kostich uchun taklif bilan chiqdi. "Bolg'achilar" 15 million evro va bonuslar taklif qilishdi.

Nemis klubi 20 million so'ramoqda. Manbaga ko'ra, britaniyaliklar uchun yana bir qiyinchilik futbolchining o'zini ishontirish bo'ladi, chunki 29 yoshli serb bo'lajak shartnomani faoliyatidagi so'nggi yirik kelishuv deb hisoblamoqda.

O'tgan mavsumda Kostich "Ayntraxt" safida barcha musobaqalarda 42 ta o'yinda maydonga tushib, 7 ta gol urdi va 15 ta golli uzatmani amalga oshirdi va nemislar safida Evropa ligasida g'olib chiqdi.

Transfermarkt.com portali Kostichning narxini 24 million evroga baholamoqda. 29 yoshli serbning shartnomasi 2023 yilning iyun oyi oxirigacha amal qiladi.